Borxhi kombëtar i Shteteve të Bashkuara të Amerikës është më shumë se dyfishuar brenda një dekade duke arritur kulmin historik prej 40 trilionë dollarësh, tregojnë shifrat e Thesarit amerikan, raporton BBC . Rritja pasqyron vite shpenzimesh të mëdha nën administratat e Donald Trumpit dhe Joe Bidenit, bashkë me pagesa më të larta interesi që i janë shtuar vazhdimisht totalit.
Në vitin 2016, borxhi kombëtar ishte pak më pak se 20 trilionë dollarë. Zyra e Buxhetit e Kongresit (BBK) kishte parashikuar që huamarrja e përgjithshme do të arrinte në 39.6 trilionë dollarë vetëm deri në fund të vitit fiskal 2026.
Rritja më e shpejtë sesa pritej ka shtuar shqetësimet rreth shpejtësisë së rritjes së nevojave të qeverisë për huamarrje dhe për atë çfarë do të thotë kjo për kostot e ardhshme të normave të interesit. BBK njofton se SHBA-ja po i afrohet kufirit të borxhit prej 41.1 trilionë dollarësh, me borxhin që parashikohet të rritet në rreth 64 trilionë dollarë deri më 2036.
Ndërsa qeveria federale shpenzon më shumë para për mbulimin e deficiteve të saj buxhetore, konsumatorët janë përballur me norma interesi dhe inflacion më të lartë. Shuma prej 40.05 trilionë dollarësh, që nga 18 gushti, mbulon të gjitha obligacionet, faturat dhe shënimet e thesarit të papaguara dhe nënvizon shkallën e huamarrjes amerikane nën dy presidentë.
Norma e interesit për obligacionet 30-vjeçare, të cilat janë një lloj borxhi i përdorur për të mbledhur fonde nga investitorët, arriti në 5.34% të martën – niveli më i lartë për pothuajse 20 vjet. Përgatiti: Rexhep Maloku – Kallxo.com