Parlamenti i Iranit do të mbajë një seancë virtuale të dielën për të shqyrtuar projektligje të veçanta mbi kundërshtimin e ndikimit të huaj dhe mbikëqyrjen e Ngushticës së Hormuzit, raportoi transmetuesi shtetëror IRIB. Anëtarët e Komitetit të Sigurisë Kombëtare të parlamentit do të shqyrtojnë një “Plan Menaxhimi të Mençur” për ngushticën, tha media.
Ligjvënësit iranianë do të shqyrtojnë gjithashtu një projektligj që synon luftimin e krimeve ndërkombëtare, shtoi ajo, shkruan AA, përcjell KosovaPress. Raporti erdhi pasi zëdhënësi i Ministrisë së Jashtme iraniane, Esmaeil Baghaei, tha të shtunën se Irani kishte arritur një marrëveshje me Omanin mbi një hartë të rrugës detare për Ngushticën e Hormuzit, pas disa javësh negociatash teknike.
Bisedimet janë pjesë e negociatave teknike të nisura sipas një memorandumi mirëkuptimi Iran-SHBA, i cili i ngarkoi Teheranit dhe Muskatit të zhvillonin një kornizë të re navigimi për Ngushticën e Hormuzit.
Ndërsa Irani dhe Omani kanë vazhduar diskutimet mbi rrugët e transportit detar, Teherani ka thënë vazhdimisht se çdo vendim për të rihapur rrugën ujore strategjike varet nga përmbushja e detyrimeve të SHBA-së sipas memorandumit.