Një shëtitje e shkurtër pas darkës mund të ndihmojë në kontrollimin e nivelit të sheqerit në gjak, sidomos pas vakteve të pasura me karbohidrate. Pas ngrënies, niveli i glukozës në gjak rritet natyrshëm. Sa e madhe dhe sa e gjatë është kjo rritje varet nga ushqimet e konsumuara, tretja dhe mënyra se si organizmi reagon përmes insulinës.
Sipas hulumtimeve, ecja pas vaktit i ndihmon muskujt të përdorin më shumë glukozë për energji. Kontraktimi i muskujve gjatë aktivitetit fizik ndihmon qelizat të marrin glukozën nga gjaku, duke ndikuar në uljen e nivelit të saj. Një rishikim sistematik i publikuar në vitin 2023 ka treguar se aktiviteti fizik pas ngrënies ul nivelet e sheqerit në gjak krahasuar me qëndrimin pa aktivitet.
Efekti mund të jetë veçanërisht i dobishëm pas darkës, pasi njerëzit shpesh konsumojnë më shumë karbohidrate gjatë këtij vakti dhe janë më pak aktivë në orët e mbrëmjes. Studimet sugjerojnë gjithashtu se ecja menjëherë pas ngrënies mund të jetë më efektive sesa pritja për një periudhë më të gjatë. Nuk është e nevojshme as një shëtitje e gjatë.
Edhe rreth 10 minuta ecje pas darkës mund të ndihmojnë në zvogëlimin e rritjes së sheqerit në gjak. Përveç ecjes, aktivitete të tjera si çiklizmi, vallëzimi, kopshtaria apo edhe punët e shtëpisë mund të kenë efekt të ngjashëm. Personat me diabet apo probleme të tjera shëndetësore këshillohen që para ndryshimit të rutinës së aktivitetit fizik të konsultohen me profesionistë shëndetësorë.
Sinjali – aty ku e vërteta flet para lajmit!