Deklaratat e presidentit amerikan, Donald Trump, se dëshiron ta shpallë Ngushticën e Hormuzit territor të Shteteve të Bashkuara kanë nxitur reagim të ashpër nga Irani, i cili ka insistuar se kontrolli mbi këtë rrugë strategjike ujore do të mbetet në duart e tij.
Zëvendësministri i Jashtëm iranian, Kazem Gharibabadi, ka deklaruar se Ngushtica e Hormuzit do të vazhdojë të mbyllet dhe të hapet vetëm me vendim të Teheranit.
“Kjo Ngushticë do të mbyllet dhe do të hapet vetëm nën komandën e Iranit, dhe për sa kohë që ju nuk e pranoni realitetin e disfatës dhe nuk i jepni fund iluzioneve tuaja imagjinare, Irani do të vazhdojë ta zbatojë bllokadën”, ka deklaruar Gharibabadi.
Trump kishte thënë se synon ta bëjë Ngushticën e Hormuzit territor amerikan, pavarësisht se juridiksioni mbi këtë rrugë ujore ndahet mes Iranit dhe Omanit. Edhe autoritetet iraniane përgjegjëse për zonën e Gjirit Persik kanë reaguar, duke thënë se Ngushtica e Hormuzit mbetet e bllokuar dhe se nuk do të rihapet derisa të pranohen kushtet e Iranit.
Tensionet rreth Hormuzit janë rritur ndjeshëm, pasi kjo rrugë ujore konsiderohet një prej pikave më të rëndësishme për transportin global të energjisë dhe përmes saj kalon një pjesë e madhe e tregtisë botërore të naftës me anije. Sipas kushteve të marrëveshjes së përkohshme, Iranit i kërkohej të rihapte Ngushticën dhe të riafirmonte se nuk do të siguronte apo zhvillonte armë bërthamore.
Në këmbim, Shtetet e Bashkuara kishin deklaruar se do të hiqnin bllokadën detare ndaj Iranit dhe do të lehtësonin sanksionet ndaj Teheranit. Sinjali – aty ku e vërteta flet para lajmit!