NATO ka dënuar shkeljet e fundit të hapësirës ajrore të Polonisë dhe Rumanisë nga dronë dhe avionë rusë, pas një takimi të jashtëzakonshëm të Këshillit të Atlantikut të Veriut të zhvilluar të mërkurën, 12 gusht. Aleatët shprehën solidaritet të plotë me Poloninë dhe Rumaninë dhe deklaruan se Rusia mban përgjegjësi për këto shkelje, të cilat i konsiderojnë të rrezikshme dhe të papranueshme.
Në deklaratë, NATO thekson se do të vazhdojë forcimin e mbrojtjes së integruar ajrore dhe raketore përgjatë krahut lindor të Aleancës, nga Deti Baltik deri në Detin e Zi, duke riafirmuar gatishmërinë për t’u përballur me çdo kërcënim. Aleatët konfirmuan gjithashtu se incidentet nuk do të ndikojnë në mbështetjen e tyre për Ukrainën.
Sipas NATO-s, siguria e Ukrainës lidhet drejtpërdrejt me sigurinë e vendeve anëtare të Aleancës. NATO theksoi se mbetet e bashkuar dhe e vendosur për të mbrojtur territorin e vendeve anëtare, ndërsa tensionet me Rusinë vijojnë të rriten në krahun lindor të Aleancës.