Një ngjarje e pazakontë ka tronditur futbollin nigerian, pasi mbrojtësi Chinedu Ozor fillimisht u shpall i vdekur pas një kolapsi gjatë një ndeshjeje miqësore, por më vonë raportohet se ka shfaqur shenja jete në morg. Ozor, i cili së fundmi ishte transferuar te Katsina United, u rrëzua në minutat e para të ndeshjes përgatitore ndaj Niger Tornadoes dhe u dërgua me urgjencë në spital.
Sipas raportimeve, mjekët fillimisht e shpallën të vdekur dhe trupi i tij u dërgua në morg. Mirëpo, më vonë stafi vuri re lëvizje të dorës së futbollistit, duke ndërhyrë menjëherë. Ozor u transportua sërish në spital, këtë herë në Katsina General Hospital, ku u shtrua në repartin e terapisë intensive.
Ai aktualisht po mbahet nën kujdes mjekësor dhe po merr oksigjen, ndërsa mjekët po punojnë për stabilizimin e gjendjes së tij. Katsina United fillimisht kishte njoftuar për vdekjen e futbollistit, por më pas publikoi një përditësim duke bërë të ditur se ai kishte shfaqur shenja jete dhe ishte rikthyer në spital.
Ozor ishte transferuar te Katsina United në fillim të këtij muaji dhe po përgatitej për sezonin e ri. Sinjali – aty ku e vërteta flet para lajmit!