Karizma shpesh duket si diçka me të cilën ose lind, ose nuk e ke fare. Disa njerëz hyjnë në një dhomë dhe arrijnë menjëherë të tërheqin vëmendjen, ndërsa të tjerë mund të jenë po aq interesantë, por nuk lënë të njëjtën përshtypje. Megjithatë, sipas ekspertes së sjelljes njerëzore dhe komunikimit Vanessa Van Edwards, karizma nuk lidhet vetëm me personalitetin.
Një pjesë e saj mund të kultivohet përmes mënyrës se si flasim dhe, mbi të gjitha, mënyrës se si i bëjmë të tjerët të ndihen gjatë një bisede. Në një artikull për Make It, Van Edwards vëren se njerëzit që konsiderohen veçanërisht karizmatikë përdorin shpesh disa fraza që i bëjnë bashkëbiseduesit të ndihen të vlerësuar, të dëgjuar dhe të rëndësishëm. Dhe pjesa më interesante?
Nuk ju duhet të jeni ekstrovertë apo të keni një personalitet shumë të fortë për t’i përdorur. 1. “Shpresoja të të takoja këtu” Një fjali e thjeshtë, por që përcjell një mesazh shumë të qartë: prania e këtij personi ka rëndësi për ju. Mund ta përdorni kur takoni dikë në një event, në punë apo edhe gjatë një daljeje me miqtë.
Në vend të një përshëndetjeje neutrale, i tregoni tjetrit se jeni vërtet të lumtur që e shihni. 2. “Do të të pëlqejë shumë kjo” Kjo frazë tregon se e njihni personin me të cilin po flisni dhe mbani mend çfarë i pëlqen. Mund të jetë një libër që sapo keni lexuar, një restorant, një film, një vend për të vizituar apo edhe një histori që e dini se do ta bëjë të qeshë.
Në thelb, i tregoni se keni menduar për të edhe kur nuk ishte aty. 3. “Si ishte për ty?” Kur dikush ju tregon për një eksperiencë të rëndësishme, është shumë e lehtë ta ktheni bisedën te vetja. Por një person karizmatik bën diçka tjetër: tregon interes dhe i jep hapësirë tjetrit të vazhdojë. Kjo pyetje e fton bashkëbiseduesin të flasë për atë që ka ndier, jo thjesht për atë që ka ndodhur.
Dhe pikërisht kjo mund ta bëjë një bisedë të zakonshme të ndihet shumë më personale. 4. “Sa herë që flasim, largohem duke menduar se…” Njerëzit që na bëjnë të ndihemi mirë nuk i mbajnë gjithmonë për vete përshtypjet pozitive që kanë për ne. Ata i shprehin. Nëse ju pëlqen mënyra si dikush mendon, humori i tij, zgjuarsia apo mënyra si sillet me të tjerët, tregojani.
Një kompliment specifik ka shumë më tepër peshë sesa një “je shumë i mirë” i përgjithshëm. 5. “Kam kohë që dua të të pyes diçka” T’i kërkosh dikujt mendimin ose këshillën është një mënyrë e thjeshtë për t’i treguar se e vlerëson. Kjo frazë përcjell idenë se mendimi i tij ju ka interesuar prej kohësh dhe se i besoni përvojës ose gjykimit të tij.
Në të njëjtën kohë, e zhvendos bisedën nga sipërfaqësorja drejt një komunikimi më personal. Në fund, njerëzit më karizmatikë nuk janë domosdoshmërisht ata që flasin më shumë, bëjnë më shumë zhurmë apo kërkojnë gjithë vëmendjen. Shpesh janë pikërisht ata që dinë t’i bëjnë të tjerët të ndihen të dëgjuar, të vlerësuar dhe të kuptuar.
Dhe ndonjëherë, për ta ndryshuar mënyrën si dikush ndihet pranë jush, mjafton një fjali e vetme.