Trajneri i Manchester Cityt, Enzo Maresca, ka lavdëruar karakterin e Elliot Anderson pas transferimit të mesfushorit anglez te “Qytetarët”, pas një sezoni mbresëlënës me Nottingham Forest. Anderson zhvilloi të gjitha ndeshjet e Ligës Premier sezonin e kaluar me Nottingham Forest dhe ishte futbollisti që përshkoi më shumë kilometra se çdo lojtar tjetër në kampionat.
Ai gjithashtu pati një rol të rëndësishëm me kombëtaren e Anglisë në Kupën e Botës 2026, duke ndihmuar “Tre Luanët” të arrinin deri në gjysmëfinale. Maresca theksoi se cilësitë e Anderson nuk kufizohen vetëm te paraqitjet në fushë.
Duke folur për City Studios në Seul, trajneri italian e përshkroi 23-vjeçarin si një futbollist “fantastik”, ndërsa vlerësoi veçanërisht modestinë dhe sjelljen e tij. “Kur marrim një vendim, nuk shohim vetëm se si është një lojtar në fushë. Shikojmë edhe personin, qenien njerëzore, dhe Elliot i ka të gjitha këto cilësi”, deklaroi Maresca.
Trajneri i Manchester Cityt shtoi se do të jetë kënaqësi të punojë me mesfushorin anglez, i cili pritet të jetë një nga përforcimet e rëndësishme të skuadrës për sezonin e ri.