Të paktën 26 persona kanë humbur jetën pas një tërmeti të fuqishëm me magnitudë 7.4 që goditi Kolumbinë perëndimore, ndërsa ekipet e emergjencës po vijojnë kërkimet për persona të tjerë që dyshohet se kanë mbetur të bllokuar nën rrënoja.
Tërmeti ka shkaktuar dëme të mëdha në ndërtesa dhe infrastrukturë, ndërsa lëkundjet janë ndjerë në një pjesë të gjerë të vendit, përfshirë qytetet Cali dhe Medellín. Sipas të dhënave të Shërbimit Gjeologjik të Shteteve të Bashkuara (USGS), epiqendra e tërmetit ishte pranë San José del Palmar, në rajonin Chocó.
Në qytetin e Calit, të paktën 20 ndërtesa raportohet se janë shembur, ndërsa persona dyshohet se ndodhen ende të bllokuar brenda tyre. Të dhënat janë bërë të ditura nga kryebashkiaku i Calit, Alejandro Eder, sipas Reuters. Dëme të konsiderueshme janë raportuar edhe në qytetet Quibdó dhe Pereira, ku autoritetet kanë konfirmuar persona të lënduar dhe dëmtime në ndërtesa.
Ekipet e emergjencës kanë nisur operacionet e kërkim-shpëtimit, ndërsa autoritetet po vlerësojnë përmasat e dëmeve të shkaktuara nga tërmeti. Ndër objektet e dëmtuara është edhe Katedralja e Manizalesit, e cila ka pësuar dëmtime nga lëkundjet e fuqishme.
Autoritetet kolumbiane vijojnë të monitorojnë situatën, ndërsa ekipet e shpëtimit po punojnë për të nxjerrë personat që mund të kenë mbetur nën rrënoja./Telegrafi.