Kryeministri Edi Rama ka reaguar për një zbulim të pazakontë në Kashar, ku një trung peme rreth 8 metra i gjatë është gjetur brenda kolektorit kryesor të ujërave të zeza.
Kreu i qeverisë bën me dije përmes një postimi në Facebook se është zbuluar pas më shumë se një dekade, shkaku përse reshjet e shiut në zonë shoqëroheshin me daljen e ujërave të zeza në Bulevardin e Kasharit dhe në lagjet përreth.
Ai sqaron se pas përdorimit të kamerave speciale nëntokësore, është bërë i mundur identifikimi i një trungu peme rreth 8 metra të gjatë, i shtrirë brenda tubacionit kryesor. Sipas Kryeministrit Rama, bëhet fjalë për një çinar që ndodhej në zonën ku ishte ndërtuar kolektori. Gjatë punimeve, pema është prerë dhe, në vend që të largohej nga kantieri, është lënë brenda kolektorit.
“Një çinar i madh, 8 metra i gjatë që gjendej atypari, u pre dhe, në vend që të largohej nga kantieri, u ‘varros’ brenda kolektorit” , shkruan Rama. Rama e ka cilësuar rastin si një shembull të problemeve të trashëguara nga e kaluara, duke e lidhur zbulimin me nevojën për reformimin dhe përmirësimin e administrimit të territorit dhe infrastrukturës.
“Kjo është edhe një kujtesë shumë konkrete për të gjithë ata që kanë harruar pse Shqipërisë i duhej Reforma Territoriale”, shprehet Kryeministri. Postimi i plotë: NJË PEMË 8 METROSHE U ZBULUA E “VARROSUR” NË KOLEKTORIN E UJËRAVE TË ZEZA Për më shumë se një dekadë, sa herë binte një shi sado i shkurtër, ujërat e zeza merrnin mbarë bulevardin e Kasharit dhe shpërthenin nëpër lagje.
Preventiva, ndërhyrje, rindërhyrje të pasuksesshme derisa dje u zbulua shkaku i vërtetë dhe i pabesueshëm i bereqetit të zi që sillte shiu sa herë binte mbi Kashar, ku përpara Reformës së Parë Territoriale, Komuna e Kasharit, një bastion krenar i demokratëve, ndërtoi kolektorin kryesor të ujërave të zeza në Bulevardin e Kasharit.
Kamerat speciale nëntokësore hynë brenda në kolektor dhe gjetën aty atë që zor se mund ta kapte edhe fantazia më e shfrenuar: Një trung peme 8 metrosh i shtrirë brenda tubit kryesor të ujërave të zeza Pra gjatë punimeve, një çinar i madh, 8 metra i gjatë që gjendej atypari, u pre dhe, në vend që të largohej nga kantieri, u “varros” brenda kolektorit!
Se çfare u tha mendja atyre që e urdhëruan dhe e zbatuan këtë veprim kriminal vetëm Zoti e di, por kjo është edhe një kujtesë shumë konkrete për të gjithë ata që kanë harruar pse Shqipërisë i duhej Reforma Territoriale. Sot pema është nxjerrë. Kolektori është çliruar.
Dhe banorët e Kasharit nuk do ta kenë më taksiratin e faturës së një poshtërsie kriminale si ajo që i torturoi për më shumë se dhjetë vjet. Shqipëria e re nuk është vetëm Europa e Ballkanit që po ndërtojmë, po edhe ajo që zbulon, pastron dhe korrigjon deformimet e mbetura ende në rrugën tonë nga Gropa e Zezë e Ballkanit që ky vend ishte kur ne morëm detyrën.