Shërbimet policore dhe ekipet mjeko-ligjore në Spanjë kanë shtuar kapacitetet e tyre për të identifikuar 80 migrantët e gjetur të vdekur pas fluksit masiv në enklavën spanjolle të Ceutës, ndërsa dhjetëra familje presin ende lajme për fatin e të afërmve të tyre të zhdukur.
Autoritetet kanë bërë të ditur se pjesa më e madhe e viktimave pritet të varroset në Ceuta gjatë ditëve në vijim, ndërsa për trupat që nuk janë identifikuar ende janë mbledhur gjurmët e gishtërinjve dhe mostrat e ADN-së, të cilat do të përdoren për të përcaktuar identitetin e tyre.
Situata ka vënë nën presion ekipet lokale mjeko-ligjore, të cilat janë përballur me një numër jashtëzakonisht të lartë viktimash. Ekipi prej pesë specialistësh në Ceuta, i cili gjatë gjithë vitit të kaluar kishte trajtuar vetëm 76 raste vdekjesh, tashmë është përballur me një situatë të paprecedentë.
Për të përballuar ngarkesën, tetë specialistë të tjerë janë dërguar nga Spanja kontinentale, ndërsa një morg i përkohshëm është ngritur në një ish-spital ushtarak.
“Kemi hasur një numër kaq të madh viktimash sa aftësitë tona operacionale janë tejkaluar”, deklaroi kreu i ekipit mjeko-ligjor, Manuel Aparthero, i cili u thirr për të certifikuar vdekjet e migrantëve të sjellë në breg më 30 korrik. Ndërkohë, familjet e personave të zhdukur vazhdojnë kërkimet dhe presin përgjigje.
Shumë prej tyre kanë publikuar fotografi në rrjetet sociale dhe ndjekin çdo informacion të mundshëm, duke shpresuar se të afërmit e tyre mund të jenë ende gjallë. Jamal Bahloul, 26 vjeç, tregoi për ankthin që po përjeton familja e tij për vëllain 22-vjeçar Mohamed, një punëtor ndërtimi nga Tangieri, i cili u largua nga shtëpia dhe nuk është dëgjuar më që prej 30 korrikut.
“Nuk kemi dëgjuar asgjë tjetër. Nuk e dimë nëse ai është në Ceuta apo nëse ka vdekur”, tha ai. Familjarë të tjerë janë mbledhur pranë kufirit mes Marokut dhe Ceutës, duke kërkuar informacion nga autoritetet dhe duke vizituar qendrat ku mbahen trupat e viktimave.
Sipas autoriteteve spanjolle, rreth 72 mijë persona kanë hyrë në mënyrë të paligjshme në Ceuta nga Maroku gjatë 24 orëve të fundit, duke shkaktuar një prej krizave më të rënda të emigracionit në këtë zonë. Nga ekzaminimet mjeko-ligjore rezulton se shumë prej viktimave kanë humbur jetën nga arresti kardiopulmonar, një pasojë e zakonshme e mbytjes.
Deri tani, vetëm katër trupa janë identifikuar përmes gjurmëve të gishtërinjve në bazat e të dhënave spanjolle ose përmes analizave të ADN-së, ndërsa për katër të tjerë vijojnë kontrollet. Policia spanjolle u ka dërguar autoriteteve marokene të dhënat e mbledhura nga viktimat.
Në kufi është ngritur një zyrë e posaçme ku familjarët mund të raportojnë persona të zhdukur dhe të japin mostra ADN-je për krahasim. Deri tani janë regjistruar 19 kërkesa të tilla. Procesi i identifikimit po zhvillohet sipas protokolleve të përdorura për fatkeqësi me viktima masive, të njëjta me ato që aplikohen në katastrofa natyrore apo aksidente të mëdha.
Organizatat humanitare kanë kritikuar më herët autoritetet spanjolle për trajtimin e rasteve të tilla me migrantë, duke argumentuar se nuk janë zbatuar gjithmonë të njëjtat procedura si në tragjedi të tjera me numër të lartë viktimash.
Autoritetet kanë bërë të ditur se trupat do të varrosen në Ceuta në ditët e ardhshme, përveç rasteve kur familjarët e viktimave të identifikuara kërkojnë riatdhesimin e tyre. Në raste të veçanta, mund të lejohet edhe djegia e trupave jashtë vendit me autorizim gjyqësor.
Pas përfundimit të autopsive, ekipet mjeko-ligjore kanë ndjekur edhe ritet fetare islame në trajtimin e viktimave, duke respektuar bindjet dhe traditat e tyre.