Qytetet pritëse të Kupës së Botës FIFA 2026 në Shtetet e Bashkuara kanë kërkuar sqarime nga FIFA lidhur me pagesat prej 1 milion dollarësh për secilin qytet, të premtuara para zhvillimit të turneut.
Financimi ishte njoftuar nga presidenti i FIFA-s, Gianni Infantino, për 11 qytetet pritëse amerikane, me synimin për ndërtimin e fushave të vogla të futbollit dhe mbështetjen e projekteve sociale në komunitetet lokale.
Megjithatë, fondet ende nuk janë transferuar, çka ka bërë që autoritetet lokale të kërkojnë një përditësim lidhur me statusin e financimit të premtuar nga institucioni qeverisës i futbollit botëror. FIFA nuk ka publikuar ende një deklaratë zyrtare për vonesën e pagesave.
Sipas raportimeve, qytetet pritëse janë siguruar vazhdimisht se kontributi prej 1 milion dollarësh për secilin qytet do të shpërndahet. Qytetet amerikane që pritën ndeshjet e Botërorit 2026 ishin Seattle, zona e Gjirit të San Franciskos, Los Angeles, Dallas, Houston, Kansas City, Atlanta, Filadelfia, New York/New Jersey, Miami dhe Boston.
Ndërkohë, FIFA përfiton pjesën më të madhe të të ardhurave nga shitja e biletave, të drejtat televizive, sponsorët dhe aktivitetet tregtare, ndërsa qytetet pritëse mbulojnë një pjesë të konsiderueshme të kostove organizative, përfshirë sigurinë, transportin, operacionet në stadiume dhe organizimin e zonave të tifozëve. Sinjali – aty ku e vërteta flet para lajmit!