Legjenda e muzikës, Bruce Springsteen, ka ndarë një përditësim të mirë për shëndetin e gruas së tij, Patti Scialfa. Artisti 76-vjeçar, i njohur për hitin “Born in the U.S.A.”, u shfaq përmes një mesazhi të regjistruar paraprakisht në aktivitetin bamirës të çiklizmit Pan-Mass Challenge, një event që mbledh fonde për kërkimin shkencor kundër kancerit.
“Jemi pak me vonesë, por ja ku jemi dhe është kënaqësi të jem me ju” , tha Springsteen në videon e publikuar më pas në rrjetet sociale, shkruan JustJared. Duke folur për rëndësinë e këtij aktiviteti, ai u shpreh: “Që nga viti 1980, ju keni frymëzuar një komunitet që ka bërë diçka të jashtëzakonshme.
Nuk keni reshtur kurrë së besuari se njerëzit e zakonshëm mund të bëjnë ndryshime të jashtëzakonshme. Dhe falë kësaj, shumë jetë janë shpëtuar.” Springsteen më pas zbuloi se Patti Scialfa ka jetuar me mielomë multiple për më shumë se tetë vjet, por dha lajmin e shumëpritur se ajo aktualisht është në fazën e remisionit.
“Patti ka jetuar me mielomën multiple për më shumë se tetë vjet, por tani, fatmirësisht, sëmundja është në remision”, tha ai.
Ai gjithashtu vlerësoi mjekët dhe infermierët që kanë qenë pranë familjes së tij gjatë kësaj periudhe të vështirë: “Është mjeku ynë, i cili nuk ndalon kurrë së kërkuari dhe së kujdesuri; është infermierja jonë që ulet pranë nesh kur kemi frikë dhe që gjithmonë e bën rrugëtimin tonë pak më të lehtë.” Springsteen theksoi se gjatë gjithë jetës së tij ka shkruar këngë për njerëzit që vazhdojnë të besojnë edhe kur përballen me vështirësi dhe për ata që nuk braktisin kurrë të tjerët.
“Kjo ka qenë gjithmonë ajo që për mua dhe Pattin përfaqëson më të mirën e Amerikës. Sot, më shumë se kurrë, bota ka nevojë për më shumë heronj të përditshëm si njerëzit që përbëjnë PMC-në”, u shpreh ai.