Banorët e fshatit Malësi e Vogël në Rahovec kanë ngritur shqetësimin për hedhjen dhe djegien e mbeturinave në hapësira të papërshtatshme. Në një postim në rrjetin social Facebook nga Faqja Malësia e Vogël, thuhet se pas ahengjeve, dasmave dhe tubimeve të ndryshme, mbeturinat po hidhen në natyrë, ndërsa në disa raste edhe po digjen plastika dhe mbeturina të tjera.
Sipas njoftimit, një veprim i tillë po ndot ajrin, tokën dhe ujin, duke dëmtuar mjedisin dhe duke i shkaktuar dëm komunitetit. Banorëve u është kërkuar që mbeturinat të mos hidhen në natyrë dhe të mos digjen, por të kontaktohet kompania e pastrimit “Ekodrinia” për largimin e tyre. “Mos e ndotni Malësinë e Vogël – ta ruajmë së bashku!”, thuhet në apel.
Në fund, banorët janë ftuar të tregojnë më shumë kulturë dhe përgjegjësi ndaj mjedisit, duke theksuar se një fshat i pastër është krenari për të gjithë.