Presidenti i Liberisë, Joseph Boakai, ka shkarkuar 12 zyrtarë shtetërorë dhe ka urdhëruar hetime ndaj disa të tjerëve, pasi vendi u trondit nga dy konfiskime të mëdha të kokainës që kanë rritur presionin publik për luftë më të ashpër kundër narkotikëve.
Në mesin e të shkarkuarve janë zyrtarë të aeroportit, drejtues të lartë të policisë, Agjencisë Kombëtare të Sigurisë (NSA) dhe institucioneve të tjera të zbatimit të ligjit.
Presidenti ka urdhëruar gjithashtu largimin nga detyra të të gjithë punonjësve shtetërorë dhe zyrtarëve të rendit që janë nën aktakuzë në lidhje me këto raste, ndërsa disa dosje janë dërguar në Ministrinë e Drejtësisë për ndjekje penale.
Vendimi vjen pasi autoritetet liberiane konfiskuan këtë muaj pranë Aeroportit Ndërkombëtar “Roberts” gati katër tonë kokainë , me vlerë të vlerësuar rreth 277 milionë euro . Ky ishte konfiskimi i dytë i madh brenda pak javësh.
Në qershor, rreth 238 kilogramë kokainë , me vlerë afro 16.5 milionë euro , u zbuluan të fshehura mes mallrave të zakonshme tregtare, përfshirë kubet e erëzës Maggi , në të njëjtin aeroport. Pas konfiskimit të parë, Boakai kishte urdhëruar një hetim të koordinuar, duke kërkuar që çdo person i përfshirë të mbahet përgjegjës sipas ligjit, raporton Euronews, transmeton Sinjali.
Sipas organizatës Global Initiative Against Transnational Organized Crime , Afrika Perëndimore është një nga korridoret kryesore të trafikut të kokainës drejt Evropës. Rastet kanë nxitur reagime të forta në Liberi, ndërsa javë më parë qindra protestues dolën në rrugët e kryeqytetit Monrovia, duke kërkuar arrestime dhe veprime të shpejta ndaj përgjegjësve.
Sinjali – aty ku e vërteta flet para lajmit!