Kryeministri polak, Donald Tusk, ka deklaruar të enjten () se një objekt që u rrëzua në një fushë në Poloninë lindore në orët e para të së enjtes ishte ndoshta raketë ruse, raporton televizioni BBC .
Objekti i paidentifikuar ka shkaktuar një krater 10 metra të gjerë në një distancë të shkurtër nga fshati Tarnawa Kolonia, rreth 100 kilometra nga kufiri me Ukrainën gjatë një sulmi të madh rus në qytetet e Lvivit, Kievit dhe pranë Kryvyhi Rihut.
Tusk ka deklaruar fillimisht gjatë një takimi të thirrur posaçërisht në qytetin lindor të Lublinit se “të gjitha indikacionet” janë se raketa që shkeli hapësirën ajrore polake ishte raketë ruse Kh-101. Ai më pas ka dalë në vendin e incidentit dhe ka theksuar se sipas ekspertëve ushtarakë shumica e “fragmenteve të rikuperuara tregojnë se ishte një raketë ruse Kh-101”.
Edhe pse nuk ishin raportuar viktima në incidentin e së enjtes pranë Tarnawa Kolonias, kryeministri polak e bëri të qartë se po merrej shumë seriozisht. Nuk kishte kërcënim të menjëhershëm pasi nuk kishte rënë në një zonë të ndërtuar, tha ai, duke shtuar se “ne ishim të përgatitur ta rrëzonim nëse do ta vazhdonte fluturimin”.
Ministri polak i Mbrojtjes, Wladyslaw Kosiniak-Kamysz, ka theksuar se rreth 20 objekte u panë pranë hapësirës ajrore polake gjatë natës dhe se po kryhen analiza piroteknike.
Ministri i Jashtëm në detyrë i Ukrainës, Andriy Sybiha, kishte deklaruar më parë se një raketë ruse Kh-101 kishte “kaluar në Poloni si pjesë e sulmit masiv të Rusisë kundër Ukrainës, duke shkelur hapësirën ajrore të NATO-s”.
Tusk ka theksuar se ishte në kontakt me liderët e tjerë europianë dhe shefi i Këshillit Evropian, Antonio Costa, ka thënë se “sulmi masiv i kombinuar i Rusisë kundër Ukrainës” ka spikatur përsëri se “agresioni i Rusisë është kërcënim për sigurinë në tërësi”.
Të paktën tetë persona vdiqën dhe dhjetëra të tjerë u plagosën në të gjithë Ukrainën, përfshirë gjashtë anëtarë të një familjeje në një fshat pranë Kryvyih Rihut. Dhjetëra të tjerë u plagosën në Lviv, jo shumë larg kufirit perëndimor të Ukrainës me Poloninë.
Një numër dronësh rusë dhe një raketë ruse e paarmatosur kanë rënë në Poloni qysh se filloi lufta në shkallë të plotë e Rusisë në Ukrainë në shkurt të vitit 2022. Dy fermerë polakë u vranë nga një raketë që ra pak përtej kufirit nga Ukraina në nëntor të vitit 2022, por besohet se kjo ishte një raketë e mbrojtjes ajrore ukrainase në përgjigje të një sulmi rus.
Ushtria e Polonisë ka spikatur objektin rreth orës të së enjtes dhe aktivizoi një avion luftarak F-16 për ta kapur para se të zhdukej disa minuta më vonë nga sistemet e radarëve. Një helikopter ushtarak u angazhua më pas për ta kërkuar në zonë. Sirenat e sulmit ajror u dëgjuan në Lublin dhe Krasnystaw më në juglindje për shkak të sulmeve ajrore ruse në Ukrainën fqinje.
Banorët në Tarnawa Kolonia raportuan se dëgjuan një zhurmë të fortë rreth orës dhe policia gjeti vendin e rrëzimit rreth një orë më vonë. Lideri polak ishte takuar me presidentin ukrainas, Volodymyr Zelensky, në Lublin mbrëmjen e kaluar, ndërsa Zelensky po kthehej nga bisedimet me presidentin e SHBA-së, Donald Trump. Përgatiti: Rexhep Maloku – Kallxo.com