Rikthimi i Roberto Mancinit në krye të Kombëtares së Italisë ka ndezur debat të madh në futbollin italian. Edhe pse u emërua zyrtarisht si selektor pas ndryshimeve në Federatën Italiane të Futbollit, jo të gjithë e kanë mirëpritur kthimin e tij.
Sipas mediave italiane, arsyeja e parë lidhet me ndikimin e presidentit të FIGC-së, Giovanni Malago, i cili thuhet se pati rol vendimtar në emërimin e Mancinit për shkak të marrëdhënies së tyre të afërt.
Arsyeja e dytë është se një pjesë e drejtuesve të Lega Serie A preferonin një alternativë tjetër, me Antonio Conten që konsiderohej kandidati ideal për t’u rikthyer në stolin e “Azzurrëve”. Ndërkohë, arsyeja e tretë mbetet mënyra se si Mancini u largua nga Italia në vitin 2023.
Ai dha dorëheqje pak javë para ndeshjeve vendimtare të kualifikueseve për Euro 2024 për të marrë drejtimin e Kombëtares së Arabisë Saudite. Edhe pse raportimet theksojnë se vendimi i tij nuk kishte vetëm motive financiare, shumë persona në futbollin italian nuk ia kanë falur ende atë largim.
Për këtë arsye, rikthimi i tij në stolin e Italisë vazhdon të jetë një nga temat më të diskutuara në vend.