E ardhmja e Julian Alvarez te Atletico Madridi vazhdon të jetë e paqartë, ndërsa sulmuesi argjentinas pritet të rikthehet në stërvitje pas pushimeve që mori pas Kupës së Botës 2026. Ish-sulmuesi i Manchester Cityt kishte bërë të ditur gjatë Botërorit dëshirën e tij për t’u larguar nga Atletico, me Barcelonën që vazhdon të përmendet si destinacioni i tij i preferuar.
Deklaratat e 26-vjeçarit kanë shkaktuar reagime të forta në Madrid. Drejtori ekzekutiv i Atletico Madridit, Miguel Angel Gil Marin, ka bërë të qartë se klubi nuk do të pranojë asnjë ofertë nën klauzolën e lirimit prej 500 milionë eurosh.
Barcelona mbetet e interesuar për transferimin e argjentinasit, por Atletico nuk ndodhet nën presion për ta shitur, pasi Alvarez ka kontratë të vlefshme deri në verën e vitit 2030. Ndërkohë, gazetari spanjoll Luis Cortes beson se marrëdhënia mes lojtarit dhe tifozëve është dëmtuar rëndë dhe se rikthimi i tij në ekip do të ishte shumë i vështirë.
“Julian Alvarez nuk mund të qëndrojë më te Atletico Madridi. Askush nuk do ta besojë një kërkimfalje të tij. Ai e ka bërë të qartë se dëshiron të largohet dhe ëndrra e tij nuk është të vazhdojë këtu. Duhet të gjendet një zgjidhje, përndryshe do të krijohej një precedent shumë i keq”, ka deklaruar Cortés.
Alvarez pritet t’i bashkohet skuadrës më 10 gusht, por mbetet për t’u parë nëse ai do të vazhdojë të jetë pjesë e projektit të Atletico Madridit apo do të intensifikohen përpjekjet për transferimin e tij gjatë kësaj vere.