Një 30-vjeçar ka rënë në duart e Policisë në orët e para të mëngjesit në Gjilan, pasi gjatë një kontrolli iu gjet substancë e dyshuar narkotike. Burimet e Sinjalit bëjnë me dije se bëhet fjalë për Esat Ferën (30-vjeç).
Sipas informacioneve, rreth orës , njësia Task Forca në Gjilan ka ndaluar dhe kontrolluar të dyshuarin në parkingun e diskotekës “Stop”, ku në posedim të tij janë gjetur 5.38 gram substancë e dyshuar narkotike të llojit hashash.
Substanca është sekuestruar, ndërsa hetuesit e Drejtorisë për Hetimin e Trafikimit me Narkotikë (DHTN) kanë kryer testin fushor, i cili ka rezultuar pozitiv për hashash.
Me urdhër të Prokurorit të Shtetit, ndaj Esat Ferës është iniciuar procedurë për veprën penale “Posedimi i paautorizuar i substancës narkotike, psikotrope ose analoge”, ndërsa pas intervistimit ai është liruar në procedurë të rregullt. Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
Sinjali – aty ku e vërteta flet para lajmit!