Autoritetet franceze shpëtuan 157 persona të enjten, të cilët po përpiqeshin të kalonin Kanalin Anglez dhe Detin e Veriut me varka të vogla për të arritur në Britaninë e Madhe, njoftuan sot mediat franceze. Në orët e para të mëngjesit, autoritetet portuale u informuan për një grup të madh personash të mbledhur në një plazh pranë Visan, në bregdetin verior të Francës.
Sipas autoritetit detar Premar, tre persona u shpëtuan nga ekipet e emergjencës pasi zbritën vetë në Calais, rreth 20 kilometra larg vendit të nisjes. Një tjetër tentativë për kalim, këtë herë nga plazhi i Portel, më në jug, kërkoi angazhimin e forcave të shumta të sigurisë. Tetë persona që ndodheshin në vështirësi u shpëtuan nga shërbimet zjarrfikëse ndërsa ishin ende në breg.
Pak më vonë, 70 persona që ndodheshin në të njëjtën varkë u shpëtuan dhe u kthyen në Calais. Ndërkohë, një tjetër varkë u pikas në zonën Ecou, pranë Boulogne-sur-Mer. Me ndërhyrjen e autoriteteve portuale, 67 pasagjerët e saj u shpëtuan, ndërsa në dy varka të tjera më të vogla u nxorën në breg edhe nëntë emigrantë të tjerë.
Pas muajsh negociatash, Franca dhe Britania e Madhe arritën në prill një marrëveshje të re trevjeçare për të frenuar kalimet e paligjshme në Kanalin Anglez. Marrëveshja parashikon rritjen graduale të kontributit financiar të Londrës për përforcimin e masave të sigurisë.
Sipas një përllogaritjeje të AFP-së, bazuar në të dhënat zyrtare franceze dhe britanike, të paktën 29 emigrantë humbën jetën gjatë vitit 2025 në përpjekje për të kaluar Kanalin Anglez. Ndërkohë, që nga fillimi i këtij viti janë regjistruar të paktën tetë viktima.