Një 23-vjeçar ka humbur jetën tragjikisht në orët e para të mëngjesit të së dielës, pasi u godit nga një tren në zonën e Stacionit Jugor (Südbahnhof) në Darmstadt të Gjermanisë. Sipas informacioneve paraprake, aksidenti ndodhi rreth orës , kur i riu, për arsye ende të paqarta, ndodhej në binarë dhe u përplas nga një tren që po kalonte.
Pavarësisht reagimit të shpejtë të ekipeve të emergjencës, 23-vjeçari nuk arriti t’u mbijetojë plagëve dhe u shpall i vdekur në vendin e ngjarjes, raporton media gjermane Blaulicht, përcjell Sinjali. Për shkak të aksidentit, qarkullimi hekurudhor në atë segment u ndërpre përkohësisht, duke shkaktuar vonesa dhe kufizime në trafikun e trenave.
Sipas dëshmive të disa personave që ndodheshin në vendngjarje, ekziston dyshimi se i riu mund të ketë qenë nën ndikimin e alkoolit në momentin e aksidentit. Megjithatë, autoritetet theksojnë se kjo mbetet vetëm një pistë hetimi dhe ende nuk është konfirmuar.
Hetimet për zbardhjen e plotë të rrethanave të aksidentit fatal janë marrë përsipër nga sektori përkatës i Policisë Kriminale në Darmstadt. Autoritetet kanë bërë të ditur se hetimet vazhdojnë dhe se informacione të tjera do të publikohen sapo të ketë zhvillime të reja. Sinjali – aty ku e vërteta flet para lajmit!