Ka momente në futboll që shkojnë përtej rezultateve. Mbrëmja e së dielës mund të jetë pikërisht një prej tyre. Lionel Messi, njeriu që për më shumë se dy dekada ka mbajtur mbi supe ëndrrat e një kombi, mund të luajë ndeshjen e fundit me fanellën e Argjentinës, duke mbyllur një kapitull të artë që ka prekur zemrat e miliona tifozëve në mbarë botën.
Gjithçka nisi më , kur një djalosh i vogël me talent të jashtëzakonshëm debutoi me “Albicelestet”. Askush nuk e imagjinonte se ai do të bëhej simboli më i madh i futbollit modern dhe një nga legjendat më të mëdha të të gjitha kohërave. Rruga e Messit nuk ka qenë vetëm e mbushur me lavdi. Ajo ka njohur edhe dhimbje të mëdha.
Pas humbjes dramatike në finalen e Kupës së Amerikës ndaj Kilit në vitin 2016, ai shpalli largimin nga kombëtarja. Ishte një moment që tronditi Argjentinën dhe botën e futbollit. Kritikat, krahasimet me Diego Maradonën dhe zhgënjimi dukeshin se kishin marrë fundin e një historie të paharrueshme. Por legjendat nuk dorëzohen.
Messi u rikthye dhe shkroi kapitullin më të bukur të karrierës së tij. Fillimisht i dha fund pritjes 28-vjeçare të Argjentinës duke fituar Copa America në vitin 2021, ndërsa një vit më vonë ngriti trofeun e Kupës së Botës, për të përmbushur ëndrrën e jetës së tij dhe duke fituar përgjithmonë zemrat e tifozëve. Edhe në moshën 39-vjeçare, Messi vazhdon të sfidojë kohën.
Në këtë Botëror ai ka qenë vendimtar me gola, asiste dhe paraqitje spektakolare, duke thyer rekorde dhe duke dëshmuar se magjia e tij nuk është shuar. Çdo prekje e topit, çdo driblim dhe çdo gol rikujton pse ai konsiderohet nga shumë si futbollisti më i madh në histori. Tani mbetet edhe një sfidë. Një ndeshje që mund të jetë e fundit me fanellën bardhekaltër.
Nëse kjo do të jetë vërtet lamtumira e Messit, ajo nuk do të jetë një fund i zakonshëm, por mbyllja madhështore e një epoke që frymëzoi breza të tërë. Sepse, pavarësisht rezultatit, Lionel Messi nuk ka më nevojë të provojë asgjë. Ai është tashmë një legjendë e pavdekshme e futbollit. Dhe të mendosh se vetëm dhjetë vjet më parë ishte gati t’i thoshte lamtumirë përgjithmonë Argjentinës.