Korpusi i Gardës Revolucionare Islamike të Iranit ka pretenduar se Forca Hapësinore iraniane ka sulmuar një bazë ushtarake amerikane në Kuvajt, në kuadër të valës së 12-të të operacionit hakmarrës ndaj Shteteve të Bashkuara.
Sipas agjencisë iraniane “Mehr”, IRGC-ja deklaroi se në sulm janë goditur një radar i mbrojtjes raketore, disa depo armësh, dy lëshues të sistemit HIMARS dhe raketa të ruajtura në bazë. Garda Revolucionare pretendoi se sulmi shkaktoi një zjarr të madh, por deri më tani nuk ka konfirmim të pavarur për dëmet apo viktimat e mundshme.
Sipas IRGC-së, operacioni ishte përgjigje ndaj sulmeve të fundit amerikane, të cilat Teherani thotë se kanë goditur objekte civile, punonjës të telekomunikacionit dhe hekurudhave, si dhe automjete.
Ndërkohë, Komanda Qendrore e SHBA-së njoftoi se kishte përfunduar një tjetër valë sulmesh ndaj objektivave ushtarake iraniane, duke shënuar natën e gjashtë radhazi të operacioneve amerikane kundër aseteve të Iranit. Tensionet në rajon janë përshkallëzuar që nga shkurti, kur SHBA-ja dhe Izraeli nisën një ofensivë të përbashkët kundër Iranit.
Teherani është kundërpërgjigjur me sulme me raketa dhe dronë ndaj objektivave në vendet e Gjirit ku ndodhen baza dhe asete ushtarake amerikane. Sinjali – aty ku e vërteta flet para lajmit!