Kanadaja ka regjistruar një fitore historike 6-0 ndaj Katarit në Kupën e Botës 2026, në një ndeshje të dominuar plotësisht dhe të mbushur me dramë. Serinë e golave e hapi Cyle Larin në minutën e 16-të, përpara se ylli i mbrëmjes, Jonathan David, të dyfishonte dhe trefishonte shifrat me golat e tij në minutat 29′ dhe 45+3′.
Gjatë këtij fraksioni, Katari mbeti me dhjetë lojtarë pasi Homam Ahmed u ndëshkua me karton të kuq direkt në minutën e 33-të. Pjesa e dytë solli edhe më shumë tension dhe fatkeqësi për të dyja palët.
Në minutën e 53-të, katarasi Assim Madibo doli nga fusha me karton të kuq pas një ndërhyrjeje brutale që i shkaktoi një dëmtim të tmerrshëm mesfushorit kanadez, Ismael Kone, i cili u largua me barelë mes lotëve.
Duke përfituar nga fakti që kundërshtari mbeti me nëntë lojtarë, Kanadaja goditi sërish me Nathan-Dylan Saliba në minutën e 64-t, i cili e shënoi me goditje dënimi dhe ia dedikoi golin Kones. Rënia totale e Katarit u pasqyrua më tej me një autogol të mbrojtësit Mohammed Manai në minutën e 75-të, pas presionit të lartë kanadez.
Për t’i vënë vulën këtij spektakli absolut, Jonathan David shënoi nga afër në minutën e 90+2′, duke kompletuar tregolëshin e tij personal. Kjo fitore e thellë 6-0 e konfirmon Kanadanë si një skuadër të frikshme në këtë Botëror, ndonëse dëmtimi tronditës i Kones lë një shije të hidhur për pjesën e mbetur të turneut.