Fitorja dominuese e Kanadasë ndaj Katarit në ndeshjen e vlefshme për fazën e grupeve të Kupës së Botës 2026 u errësua nga një skenë vërtet e frikshme. Mesfushori i talentuar kanadez, Ismael Kone, ka pësuar një nga dëmtimet më të rënda në këtë turne, duke thyer këmbën pas një ndërhyrjeje brutale. Ngjarja tronditëse ndodhi në minutën e 51-të të takimit.
Futbollisti i Katarit, Assim Madibo, ndërhyri në mënyrë jashtëzakonisht të ashpër dhe me vonesë ndaj Kones. Reagimi i menjëhershëm i yllit kanadez, i cili mbeti i shtrirë duke parë me tmerr këmbën e tij të dëmtuar rëndë, e bëri të qartë për të gjithë ashpërsinë e situatës.
Në një gjest solidariteti dhe për ta mbrojtur nga kamerat, stafi i stolit dhe lojtarët e tjerë të Kanadasë formuan menjëherë një rreth human përreth Kones. Ata nuk e lejuan që ky dëmtim i rëndë të filmohej, teksa mjekët po i jepnin ndihmën e parë përpara se ta nxirrnin nga fusha me barelë.
Arbitri fillimisht i tregoi kartonin e verdhë lojtarit nga Katari, por pasi u njoftua për të rishikuar pamjet në monitorin e VAR-it, ndëshkimi u ndryshua me të drejtë në një karton të kuq direkt në minutën e 54-t.
Ky nuk ishte kartoni i parë i kuq për katarasit, pasi në pjesën e parë (në minutën e 33-të), Homam Ahmed u përjashtua gjithashtu pas një faulli si lojtar i fundit, duke bërë që Katari ta mbyllte ndeshjen me vetëm 9 lojtarë.
Pavarësisht shokut emocional për shokun e tyre të skuadrës, kombëtarja kanadeze tregoi forcë karakteri duke thelluar avantazhin dhe duke dominuar tërësisht lojën me një fitore të thellë që i afron ata më shumë drejt fazës me eliminim direkt.
Megjithatë, kjo fitore ka një shije tepër të hidhur, pasi trajnerit dhe tifozëve të Kanadasë do t’u duhet të vazhdojnë ëndrrën e tyre në Kupën e Botës pa një prej yjeve të tyre kryesorë. Kliko këtu për videon, kujdes pamje të rënda