Një operacion i Guardia di Finanza ka çuar në goditjen e një rrjeti të dyshuar të trafikut të drogës në Itali, ku janë sekuestruar më shumë se 111 kilogramë kokainë dhe janë arrestuar tre persona. Sipas autoriteteve italiane, droga u zbulua gjatë një aksioni të zhvilluar nga Komanda Provinciale e Ankonës, pas monitorimit të një automjeti të dyshimtë që lëvizte drejt zonës së Parmës.
Gjatë hetimeve, efektivët vunë re një shkëmbim të dyshimtë mes personave në automjet dhe drejtuesit të një kamioni. Kontrolli i mjetit zbuloi një ndarje të fshehtë në kabinën e kamionit, ku ishin fshehur 100 pako me kokainë. Sasia e drogës e sekuestruar, sipas Guardia di Finanza, kishte një vlerë të mundshme prej rreth 20 milionë eurosh në tregun ilegal.
Gjatë operacionit u gjetën dhe u sekuestruan edhe rreth 19 mijë euro para të gatshme, të dyshuara si të lidhura me aktivitetin kriminal. Me urdhër të Prokurorisë së Parmës, në pranga kanë përfunduar tre persona, mes tyre edhe një shtetas shqiptar. Të arrestuarit, me origjinë shqiptare dhe rumune, janë dërguar në burgun e Parmës.
Autoritetet italiane kanë bërë të ditur se hetimet po vazhdojnë për të zbuluar personat e tjerë të dyshuar si pjesë e këtij rrjeti të trafikut ndërkombëtar të drogës. Sinjali – aty ku e vërteta flet para lajmit!