Trajneri i Egjiptit më në fund ka zbuluar arsyen pse bëri gjestin me shenjën “X” gjatë humbjes 3:2 të skuadrës së tij ndaj Argjentinës në ndeshjen e fazës së 1/8 së finales së Kupës së Botës. Hossam Hassan shkaktoi shumë reagime kur kryqëzoi krahët dhe bëri gjestin drejt arbitrit Francois Letexier në minutën e 98-të të takimit.
Egjipti shpërdoroi një epërsi prej 2-0 ndaj kampionëve të botës, të cilët përmbysën gjithçka falë golave të Cristiano Romeros, Lionel Messit dhe Enzo Fernandezit brenda një periudhe të çmendur prej vetëm 13 minutash. Egjiptianët u ndjenë të dëmtuar nga vendimet e arbitrimit, veçanërisht pas anulimit të golit të shënuar nga Mostafa Ziko.
Ata protestuan gjithashtu për një ndërhyrje që sipas tyre ishte faull ndaj Mohamed Salahut në aksionin që parapriu golin e Enzo Fernandezit në minutën e 93-të. Edhe Messi u përfshi në debatet e minutave të fundit të sfidës.
Gjesti me shenjën “X” përdoret zakonisht për të raportuar raste të dyshuara të abuzimit racist gjatë një ndeshjeje dhe ishte parë edhe në përballjen Benfica – Real Madrid në Ligën e Kampionëve në fillim të këtij viti.
Anëtarët e stolit të Egjiptit humbën kontrollin pas vendimeve të arbitrave dhe Hassan u pa duke bërë gjestin “X”, përpara se vëllai i tij binjak, Ibrahim Hassan, ndihmëstrajner i ekipit, t’ia ulte duart. Megjithatë, më shumë se një javë pas humbjes së rëndë, Hassan ka sqaruar se çfarë donte të thoshte me atë gjest dhe ka treguar edhe për përballjen e tij me Messin.
Sipas “The Sun”, ai deklaroi: “Gjesti nuk kishte të bënte me racizmin. Po i thosha arbitrit: ‘Nuk po tregon drejtësi’. Messi erdhi tek unë dhe më tha: ‘Pse? Pse? Pse?’ Nuk e di çfarë tha më pas. Ishte një nga rastet e rralla kur Messi u përfshi në debate gjatë një ndeshjeje. Në fund ai qau, sepse emocionalisht po kalonte një moment të vështirë.
Ne ishim një skuadër shumë e fortë dhe i vendosëm në vështirësi. U përpoqa të mos i përgjigjesha dhe të shmangia çdo përplasje verbale me të, nga respekti për karrierën e tij”.
Duke u ndjerë të dëmtuar nga arbitrimi, Federata Egjiptiane e Futbollit publikoi një deklaratë të ashpër, duke kërkuar që FIFA t’i largojë arbitrat e kësaj ndeshjeje, pasi “kërkoi përjashtimin e arbitrit dhe të gjithë ekipit të arbitrimit nga Kupa e Botës pas hetimit të këtyre gabimeve”.
Federata shtoi gjithashtu se arbitrat ishin fajtorë për “gabime të qarta dhe këmbëngulje për të mos rishikuar disa pamje”. Pas pretendimeve se Argjentina ishte favorizuar, FIFA reagoi përmes shefit të arbitrave, Pierluigi Collina, i cili i cilësoi akuzat si “pretendime të pabazuara” dhe dënoi vënien në dyshim të integritetit të arbitrave.
Hassan nuk është ndëshkuar për sjelljen e tij apo komentet pas ndeshjes, kur deklaroi se “është e qartë se presioni i ushtruar ndaj arbitrit nga pala argjentinase para ndeshjes pati sukses”. Ai shtoi gjithashtu: “Ndoshta donin ta mbanin kampionin e botës në garë.
Ndoshta donin që Messi të vazhdonte rrugëtimin.” Këto deklarata sollën reagimin e FIFA-s, megjithatë Hassan ende mund të përballet me sanksione nga organi qeverisës i futbollit botëror. Sipas The Athletic, FIFA do të presë përfundimin e turneut për të vendosur sanksionet ndaj personave që konsiderohen se kanë dëmtuar reputacionin e lojës.
Një praktikë e tillë u ndoq edhe pas Kupës së Botës 2022 në Katar. Përveç Hassanit, edhe futbollisti egjiptian Ziko mund të rrezikojë ndëshkim, ndërsa mbrojtësi i Zvicrës Manuel Akanji dhe trajneri i Anglisë Thomas Tuchel gjithashtu kanë kritikuar publikisht arbitrat.