Jürgen Klopp është shumë pranë emërimit si trajner i ri i kombëtares së Gjermanisë, pasi ka arritur një marrëveshje në parim me Federatën Gjermane të Futbollit (DFB). Ish-trajneri i Liverpoolit ka qenë objektivi kryesor për të marrë drejtimin e “Die Mannschaft”, pas paraqitjes zhgënjyese të Gjermanisë në Kupën e Botës nën drejtimin e Julian Nagelsmann.
Tani, Klopp pritet të rikthehet në pankinë në një nga emërimet më të bujshme të viteve të fundit. Sipas raportimeve të “Sky Sports Germany”, përpjekjet e DFB-së kanë hyrë në fazën vendimtare pas takimeve të nivelit të lartë të zhvilluara në Shtetet e Bashkuara të Amerikës. Raportohet se është arritur një marrëveshje në parim mes federatës dhe trajnerit 59-vjeçar.
Presidenti i DFB-së, Bernd Neuendorf, dhe zëvendëspresidenti Hans-Joachim Watzke udhëtuan drejt Nju Jorkut për t’u takuar me Kloppin dhe për të finalizuar kushtet kryesore të marrëveshjes. Ky zhvillim vjen pas muajsh spekulimesh rreth ish-trajnerit të Borussia Dortmundit dhe Liverpoolit, i cili është larguar nga pankina që prej përfundimit të sezonit 2023/24 në “Anfield”.
Kontrata e propozuar pritet të zgjasë deri në përfundim të Kupës së Botës 2030, duke i dhënë Gjermanisë stabilitetin që ka kërkuar pas rezultateve zhgënjyese në turnetë e fundit. Megjithatë, para zyrtarizimit mbetet edhe një pengesë e fundit. Klopp aktualisht është nën kontratë si drejtues i futbollit global në grupin Red Bull.
Sipas raportimeve, në fillim të javës së ardhshme do të zhvillohen bisedime në Nju Jork me drejtorin ekzekutiv të Red Bullit, Oliver Mintzlaff, për të finalizuar detajet e largimit të tij nga kompania. DFB-ja thuhet se po shqyrton një zgjidhje të veçantë për të shmangur pagesën e një dëmshpërblimi të madh.
Një nga opsionet është që Klopp të vazhdojë të jetë ambasador i markës Red Bull, ndërsa njëkohësisht të drejtojë kombëtaren gjermane. Një kompromis i tillë do t’i lejonte Red Bullit të ruante bashkëpunimin me një nga figurat më të njohura të futbollit, ndërsa Klopp do të ishte i lirë të merrte drejtimin e vendit të tij.
Trajneri gjerman raportohet se po planifikon gjithashtu një riorganizim të madh të stafit teknik për të zbatuar menjëherë filozofinë e tij të lojës. Federata Gjermane është e gatshme ta mbështesë atë në afrimin e bashkëpunëtorëve më të besuar, të cilët do të zëvendësojnë ndihmësit e stafit të mëparshëm.
Mes emrave që pritet t’i bashkohen epokës së re janë Peter Krawietz dhe Pepijn Lijnders, dy ndihmësit e ngushtë të Kloppit gjatë periudhës së tij të suksesshme te Liverpooli. Ardhja e tyre do të sinjalizonte një ndryshim të plotë në drejtimin taktik të kombëtares gjermane, duke sjellë në arenën ndërkombëtare stilin intensiv të lojës që e bëri Kloppin një legjendë të Premierligës.