Tre herë kampioni i botës në Formula 1, Ayrton Senna, është shpallur zyrtarisht “Hero i Atdheut” i Brazilit, pasi presidenti Luiz Inacio Lula da Silva nënshkroi ligjin për përfshirjen e emrit të tij në Librin e Heronjve dhe Heroinave të Atdheut.
Senna, një nga pilotët më të mëdhenj në historinë e Formula 1, mori këtë nderim përmes ligjit nr. 15.447/2026, me të cilin emri i tij regjistrohet përgjithmonë në librin përkujtimor që ruhet në Panteonin e Atdheut në Brasília, raportojnë mediat braziliane.
I lindur në São Paulo, Senna fitoi tri tituj të kampionit të botës në Formula 1, në vitet 1988, 1990 dhe 1991, ndërsa regjistroi 41 fitore në garat për Çmimin e Madh. Legjenda braziliane humbi jetën më , në moshën 34-vjeçare, pas një aksidenti tragjik gjatë Çmimit të Madh të San Marinos në Itali.
Propozimi për këtë vlerësim u paraqit nga senatori Marcos Pontes në vitin 2024 dhe mori mbështetjen e senatorit Jorge Kajuru. Ligji u miratua në Senat përmes procedurës përkatëse, pa qenë e nevojshme një votim në seancë plenare.
Libri i Heronjve dhe Heroinave të Atdheut, i krijuar në vitin 1992, përmban emrat e personaliteteve që kanë dhënë kontribut të rëndësishëm në ndërtimin dhe mbrojtjen e Brazilit. Emrat e tyre shkruhen në një libër prej çeliku, i cili ekspozohet përgjithmonë në Panteonin e Atdheut, në Sheshin e Tre Fuqive në Brasília.
Instituti Ayrton Senna e priti këtë nderim “me nder dhe mirënjohje të thellë”, duke vlerësuar se ky vendim konfirmon rëndësinë e përhershme të trashëgimisë së pilotit brazilian, e cila tashmë tejkalon kufijtë e sportit.