Zlatan Ibrahimoviçi nuk i kurseu kritikat pas eliminimit dramatik të Belgjikës në çerekfinale të Kupës së Botës, duke fajësuar drejtpërdrejt trajnerin Rudi Garcia dhe portierin Senne Lammens.
Legjenda suedeze u shpreh e habitur nga vendimi për të aktivizuar portierin e Manchester Unitedit në vend të Mike Penders, pasi Thibaut Courtois u detyrua të largohej nga fusha për shkak të një dëmtimi. Belgjika i dha fund ëndrrës për Kupën e Botës pas humbjes 2-1 ndaj Spanjës në një çerekfinale të luftuar në Los Angeles.
Golin e fitores për spanjollët e shënoi Mikel Merino në minutën e 88-të, duke përfituar nga një gabim i rëndë i Lammens, i cili nuk arriti të kontrollonte një goditje nga distanca të Pau Cubarsit, pasi kishte zëvendësuar Courtois më herët gjatë pjesës së dytë. Eliminimi solli reagime të ashpra nga Ibrahimovic, i cili fajësoi vendimet taktike të trajnerit Rudi Garcia.
Duke folur në rolin e analistit për “Fox Sports” gjatë Kupës së Botës, ish-sulmuesi i Milanit kritikoi hapur vendimin për të futur në lojë 24-vjeçarin Lammens 19 minuta para përfundimit të ndeshjes.
Ibrahimoviçi tha se nuk e kuptonte pse stafi teknik i Belgjikës preferoi portierin e Manchester Unitedit, ndërsa Mike Penders, i cili sezonin e kaluar luajti si i huazuar te Strasbourgu, mbeti gjatë gjithë turneut në bankën rezervë. “Unë e mbaj përgjegjës trajnerin e kombëtares për këtë humbje. Është një vendim që i kushtoi Belgjikës ndeshjen”, deklaroi Ibrahimovic.
Ai gjithashtu vuri në dyshim kriteret e përzgjedhjes së portierit. “Pse e zëvendësuan Courtois me Senne Lammens nga Manchester United, ndërsa Mike Penders mbeti në stol? Mos vallë sepse Lammens luan për Manchester United dhe Penders për Strasbourgun? Kështu nuk përzgjidhet portieri i një kombëtareje.
Sidomos kur sheh se çfarë ndodhi më pas.” Gabimi i Lammens e bëri atë portierin e parë zëvendësues që shkakton një gol me gabim individual në një ndeshje të Kupës së Botës që nga Dimbi Tubilandu i Republikës Demokratike të Kongos kundër Jugosllavisë në vitin 1974. Ibrahimovic nuk u ndal me kaq, duke e cilësuar Lammens si një portier që nuk është në nivelin e futbollit ndërkombëtar.
“Lammens nuk është një portier i mirë për këtë nivel. Ai është i mbivlerësuar. Penders është shumë më i mirë dhe këtë mund ta shohin të gjithë”, u shpreh suedezi. Në fund, ai rezervoi kritika edhe për stafin teknik të Belgjikës. “Ata po e menaxhojnë këtë situatë shumë keq. Është e turpshme. Turp për trajnerin e kombëtares dhe trajnerin e portierëve”, përfundoi Ibrahimoviçi .