Përballja mes Anglisë dhe Norvegjisë në Kupën e Botës nuk do të jetë vetëm një duel për gola dhe fitore. Në qendër të vëmendjes do të jetë edhe një nga miqësitë më të komentuar në botën e futbollit: ajo mes Jude Bellingham dhe Erling Haaland.
Dy yjet e futbollit u afruan gjatë kohës kur luanin së bashku te Borussia Dortmund dhe prej vitesh kanë krijuar një raport që ka tërhequr miliona tifozë në rrjetet sociale. Pamjet e tyre duke u përqafuar, duke qeshur dhe duke mbështetur njëri-tjetrin janë bërë virale, duke sjellë një imazh ndryshe të futbollistëve modernë.
Një nga momentet më të famshme daton në vitin 2021, pas fitores së Dortmundit ndaj Besiktasit, kur Haaland e cilësoi Bellingham si një lojtar “të jashtëzakonshëm”. Menjëherë më pas, norvegjezi hyri në kuadër dhe i dha një puthje shakaje në faqe mes të qeshurave.
Një tjetër video që është rikthyer gjatë Botërorit tregon Haaland duke iu afruar Bellinghamut në fushë, sikur po e mbronte pas një përplasjeje me një lojtar kundërshtar. Ekspertët e rrjeteve sociale e kanë cilësuar këtë miqësi si një kundërpeshë ndaj kulturës së konfliktit që shpesh dominon internetin.
Mark Navarra, ekspert i mediave sociale, tha se marrëdhënia mes dy futbollistëve tregon një anë më njerëzore të sportit. “Futbolli online shpesh ndërtohet mbi zemërimin dhe rivalitetin. Këto pamje i rikthejnë ata si njerëz, jo vetëm si makina golash apo yje me miliona euro”, u shpreh ai.
Sipas tij, ajo që e bën këtë miqësi të veçantë është fakti se të dy lojtarët mund të jenë rivalë të mëdhenj në fushë, por jashtë saj nuk kanë frikë të tregojnë respekt dhe afeksion për njëri-tjetrin. Miqësia e tyre është kthyer edhe në humor në internet.
Borussia Dortmund publikoi dikur një video për Ditën e Shën Valentinit ku dy futbollistët lexonin batuta romantike për njëri-tjetrin, duke shkaktuar reagime të shumta nga tifozët. Popullariteti i dy lojtarëve lidhet edhe me jetën e tyre jashtë futbollit.
Haaland njihet për një stil më të qetë jetese, ndërsa ka treguar se preferon mbrëmjet në shtëpi duke luajtur video-lojëra dhe duke kaluar kohë me familjen. Edhe Bellingham shpesh ka folur për ndikimin e familjes së tij në formimin si person dhe futbollist. Ai ka theksuar se edukimi nga prindërit e ka ndihmuar të ruajë qetësinë, pjekurinë dhe përgjegjësinë në fushë.
Pavarësisht rezultatit të ndeshjes mes Anglisë dhe Norvegjisë, duket se rivaliteti sportiv nuk do të ndikojë në marrëdhënien mes dy yjeve. Për tifozët, Bellingham dhe Haaland janë shembulli se një duel i madh mund të shoqërohet edhe me respekt, miqësi dhe pozitivitet.