Sporti zviceran i skive është në zi. Legjenda e garave të shpejtësisë, Roland Collombin, ka ndërruar jetë të premten në moshën 75-vjeçare, pas një beteje të gjatë me një sëmundje të rëndë. Lajmi u bë i ditur nga media “Le Nouvelliste”.
Si një nga figurat më emblematike të skive alpine zvicerane dhe specialist i disiplinave të shpejtësisë, Collombin la gjurmë të pashlyeshme dhe frymëzoi një brez të tërë sportistësh. Roland Collombin shkroi disa nga faqet më të lavdishme të historisë së skive zvicerane.
Një nga momentet më të paharrueshme ishte gara e disiplinës së lëshimit në Lojërat Olimpike Dimërore të vitit 1972 në Sapporo, ku fitoi medaljen e argjendtë, duke u renditur pas rivalit të tij të madh, që më vonë u bë mik i ngushtë, Bernhard Russi. Ai fitoi renditjen e përgjithshme të Kupës së Botës në lëshim në vitet 1973 dhe 1974.
Në sezonin 1973 u rendit i treti në klasifikimin e përgjithshëm të Kupës së Botës, duke regjistruar tetë fitore, të gjitha në disiplinën e zbritjes, si dhe 11 podiume në nivelin më të lartë. Përveç sukseseve, Collombin u bë i njohur edhe për rrëzimet spektakolare.
Një aksident i rëndë në Val-d’Isère në vitin 1975 i dha fund karrierës së tij sportive. \Vendi ku ndodhi ai aksident njihet edhe sot me emrin “Bosse à Collombin”. Rreth tri javë para ndarjes nga jeta, Bernhard Russi e kishte vizituar mikun e tij. “Atëherë dukej ende në gjendje relativisht të mirë.
Megjithatë, më tha se kishte edhe një përpjekje të fundit për ta mposhtur kancerin”, deklaroi Russi për median zvicerane. Me vdekjen e Roland Collombin, sporti zviceran humbi një nga legjendat më të mëdha të skive alpine.