FIFA ka reaguar me një deklaratë zyrtare pas pretendimeve që i cilësoi si “të pabazuara” lidhur me fitoren e Argjentinës ndaj Egjiptit në fazën e 1/8 së finales së Kupës së Botës. Kampionët në fuqi të botës u rikthyen nga disavantazhi 2-0 për të fituar 3-2 në Atlanta, falë golave të Cristian Romeros, Lionel Messit dhe Enzo Fernandez në minutat e fundit.
Megjithatë, fitorja u shoqërua me polemika të mëdha dhe shkaktoi zemërim në stolin e Egjiptit për disa vendime kyçe të arbitrave që shkuan në favor të Argjentinës.
Federata Egjiptiane e Futbollit publikoi një deklaratë të ashpër, duke kërkuar që FIFA t’i largojë gjyqtarët e ndeshjes nga turneu, pasi “kërkon përjashtimin e arbitrit dhe të gjithë ekipit të tij nga Kupa e Botës, pas hetimit të këtyre gabimeve”. Në deklaratë thuhej se arbitri dhe ndihmësit e tij kishin bërë “gabime të rënda dhe kishin refuzuar të rishikonin disa pamje filmike”.
Një nga rastet më të diskutuara ishte anulimi i golit të Mostafa Zikos, pasi në fazën e ndërtimit të aksionit u konstatua një faull ndaj Lisandro Martinez. Po ashtu, Egjipti pretendoi se Mohamed Salah ishte penguar nga Julian Alvarez brenda zonës së penalltisë në aksionin që parapriu golin e fitores së Enzo Fernandez në minutën e 93-të.
Këto episode nxitën teori konspirative në rrjetet sociale dhe media, ku shumë pretenduan se ekzistonte një plan për ta ndihmuar Argjentinën të fitonte Kupën e katërt të Botës. Pas këtyre pretendimeve, drejtori i arbitrimit në FIFA, Pierluigi Collina, reagoi me një deklaratë të fortë, duke dënuar “akuzat e pabazuara” dhe vënien në dyshim të integritetit të arbitrave.
Në një intervistë për faqen zyrtare të FIFA-s, italiani tha: “Sigurisht që diskutimet konstruktive mbi vendimet do të jenë gjithmonë pjesë e futbollit, por akuzat e pabazuara nuk kanë vend në sportin tonë. Askush nuk mund ta vërë në dyshim integritetin e arbitrave të Kupës së Botës. Kur ndodh kjo, mund të shkaktojë reagime që çojnë deri te kërcënimet ndaj tyre dhe familjeve të tyre.
Kjo nuk është e pranueshme. Po ashtu, askush nuk mund të pretendojë se arbitrimi i FIFA-s ndikohet nga dikush, madje as nga presidenti i FIFA-s, Gianni Infantino. Ai gjithmonë ka treguar mbështetje të plotë për ekipin e arbitrave të FIFA-s, duke na besuar të punojmë me pavarësi të plotë.
Arbitrat marrin vendime me ndershmëri dhe, ashtu si lojtarët e trajnerët, përpiqen gjithmonë të japin më të mirën.” Collina, i cili së fundmi ka analizuar edhe rregullat e reja të aplikuara në Kupën e Botës, shpjegoi edhe dy episodet që shkaktuan zemërimin e Egjiptit, duke mbrojtur vendimet e arbitrave. “Pas çdo goli, VAR kontrollon të gjithë fazën sulmuese që i paraprin golit.
Nëse konstatohet një faull gjatë ndërtimit të aksionit dhe ai ka ndikuar në realizimin e golit, VAR rekomandon rishikimin në monitor. Nuk ekziston një kufi i përcaktuar as për distancën nga porta dhe as për kohën mes incidentit dhe golit. Një shembull ishte ndeshja Argjentinë – Egjipt, ku Marwan Attia, me numrin 19 të Egjiptit, shkel qartë në këmbën e Lisandro Martinez.
Ne besojmë se një faull është faull. Pavarësisht nëse duket apo jo ‘i qartë’, nëse arbitri nuk e ka parë në fushë, VAR mund të ndërhyjë. Në të njëjtën mënyrë, nëse nuk konstatohet faull në ndërtimin e aksionit të golit, VAR e informon arbitrin për këtë.
Shkelja në këmbën e kundërshtarit është faull, ndërsa një mbrojtës që prek fillimisht topin dhe më pas bën kontakt normal futbollistik nuk ka kryer faull. Edhe ky ishte rasti në fund të së njëjtës ndeshje. Arbitri dhe VAR e vlerësuan kontaktin mes Mohamed Salahut dhe Julian Alvarezit si kontakt normal futbollistik.
Sigurisht që në disa vendime do të ekzistojë gjithmonë një element subjektiv, por ne jemi të kënaqur me mënyrën se si ky parim është zbatuar gjatë gjithë turneut.” Argjentina do të përballet me Zvicrën në çerekfinale të dielën, ndërsa fituesi i këtij takimi do të ndeshet në gjysmëfinale me fituesin e sfidës Angli – Norvegji, më 15 korrik.