Botërori ka hyrë në fazën ku çdo gabim mund të kushtojë eliminimin. Disa kombetare kanë mbijetuar falë talentit, të tjera falë organizimit dhe karakterit. Nga 48 ekipe që nisën rrugëtimin, tashmë kanë mbetur vetëm 8. Në krye të listës së favoritëve qëndron Franca. Kampionët e cilësisë dhe thellësisë së grupit kanë treguar se janë një skuadër e kompletuar.
Deschamps ka ndërtuar një ekip me shumë forcë në sulm, por edhe me ekuilibër në mbrojtje. Mbappé është lideri, por rreziku vjen nga shumë drejtime. Dembélé, Olise dhe Barcola kanë krijuar një repart ofensiv që lë pak hapësira për kundërshtarët. Maroku vazhdon të befasojë me soliditetin e tij.
Ndoshta nuk ka më të njëjtin shkëlqim si në fillim të turneut, por organizimi dhe mentaliteti mbeten armët kryesore të skuadrës afrikane. Një ekip që nuk dorëzohet dhe di të vuajë në momentet e vështira. Spanja kërkon ende identitetin e saj më të mirë. Nuk është më aq shpërthyese në krahë, por vazhdon të ketë kontrollin e lojës përmes një mesfushe me shumë teknikë dhe inteligjencë taktike.
Nëse ritmi rritet, cilësia e saj mund të bëjë diferencën. Belgjika është historia e një rikthimi. Pas një fillimi të komplikuar, ndryshimet taktike i kanë dhënë skuadrës më shumë ekuilibër. Ka shumë alternativa në sulm, por pyetja mbetet te qëndrueshmëria e mbrojtjes. Surpriza e madhe është Norvegjia. Eliminimi i Brazilit ka treguar se nuk bëhet fjalë vetëm për një rastësi.
Një skuadër e organizuar, me ide të qarta loje dhe me një armë të jashtëzakonshme, Erling Haaland. Megjithatë, mbrojtja mbetet pika ku kundërshtarët mund të kërkojnë dobësinë. Anglia paraqitet si një nga ekipet më të kompletuara. Presing i organizuar, shumë cilësi në stol dhe dy yje të nivelit botëror si Kane dhe Bellingham.
Një skuadër që di të menaxhojë momentet e ndeshjes dhe të reagojë ndaj vështirësive. Argjentina ecën përpara me zemër dhe karakter. Kampionët në fuqi nuk po shfaqin gjithmonë lojën më të bukur, por kanë ende atë forcë psikologjike që i ka shoqëruar vitet e fundit. Pyetja është nëse energjia dhe përvoja do të mjaftojnë për të mbrojtur titullin.
Ndërsa Zvicra mbetet një kundërshtar i pakëndshëm për çdo ekip. Mbrojtja dhe organizimi janë pikat e saj më të forta, por skuadra kërkon ende më shumë kreativitet në fazën sulmuese. Nga ky moment nuk ka më vend për kalkulime. Kanë mbetur vetëm tetë skuadra, por në horizont shihet vetëm një destinacion: kupa e botës.