Kapiteni i Anglisë, Harry Kane, ka bërë thirrje për mbështetje maksimale nga tifozët anglezë në prag të ndeshjes së 1/8 së finales së Kupës së Botës 2026 ndaj Meksikës. Takimi mes Meksikës dhe Anglisë do të zhvillohet sonte pas mesnatës në “Estadio Azteca”, një orar që ka ndarë opinionin e tifozëve mes atyre që do të zgjedhin gjumin dhe atyre që do ta ndjekin sfidën deri në orët e vona.
Kane ka theksuar rëndësinë e mbështetjes së tifozëve në këtë sfidë të madhe, duke e cilësuar atmosferën si një nga elementët që e bën Kupën e Botës të veçantë. “Është një lajm i mirë që lokalet do të qëndrojnë të hapura për tifozët. E dimë sa shumë do të thotë Kupa e Botës për të gjithë,” u shpreh Kane.
Ai shtoi me humor se pret një mbështetje të madhe gjatë natës: “Shpresoj të ketë disa net pa gjumë, që njerëzit ta ndjekin deri në fund dhe të festojnë deri në mëngjes.” Sulmuesi anglez theksoi gjithashtu se këto orare të pazakonta janë pjesë e magjisë së turneut. “Do të ishte fantastike për tifozët që të festojnë ndërsa lind dielli në orën 5 apo 6 të mëngjesit,” tha ai.
Ndërkohë, autoritetet britanike kanë lejuar zgjatjen e orarit të hapjes së pub-eve deri në orët e para të mëngjesit për të mbështetur tifozët gjatë ndeshjes. Kane, përveç mbështetjes së tifozëve, po synon edhe suksesin personal në garën për “Këpucën e Artë”, ku mbetet një nga kandidatët kryesorë në fazat e mbetura të turneut.