Një 28-vjeçar ka përfunduar në pranga pasi dyshohet se përmes rrjeteve sociale ka shantazhuar një vajzë të mitur, duke i kërkuar fotografi dhe video intime nën kërcënimin se do t’i publikonte materialet që posedonte, raporton Sinjali. Burimet e Sinjalit bëjnë të ditur se bëhet fjalë për Ramadan Gjetën (28-vjeçar), ndërsa viktimë është një e mitur 14-vjeçare nga Ferizaj.
Sipas burimeve, rasti ishte raportuar më 26 qershor, pasi familjarët e vajzës kishin njoftuar Policinë se një person i panjohur i kishte dërguar kërkesë për miqësi në rrjetet sociale.
Më pas, duke përdorur llogari me emra të rremë, ai kishte komunikuar me të miturën dhe e kishte kërcënuar se do t’i publikonte disa fotografi intime nëse nuk i dërgonte materiale të tjera me përmbajtje intime. Pas denoncimit, Policia, në koordinim me Prokurorin për të Mitur, inicioi rastin për veprën penale “Shtrëngim” dhe nisi hetimet.
Gjatë veprimeve hetimore u intervistuan e dëmtuara dhe një dëshmitare, ndërsa hetuesit arritën ta identifikojnë personin e dyshuar. Më 4 korrik, Ramadan Gjota u ndalua në pikëkalimin kufitar në Merdar, ku u arrestua dhe më pas u shoqërua në Stacionin Policor në Ferizaj.
Siç mëson Sinjali, gjatë intervistimit, në prani të avokatit mbrojtës, ai pranoi se kishte komunikuar me të miturën, se i kishte kërkuar fotografi dhe video intime, si dhe se i kishte dërguar asaj fotografi intime të tij. Me vendim të Prokurorisë Themelore në Ferizaj, ndaj tij është caktuar masa e ndalimit për 48 orë, ndërsa hetimet për rastin janë në vazhdim.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata. Sinjali – aty ku e vërteta flet para lajmit!