Organizata Ndërkombëtare Detare e Kombeve të Bashkuara (IMO) ka pezulluar planin për evakuimin e më shumë se 11,000 detarëve të bllokuar në Ngushticën e Hormuzit, pas një sulmi ndaj një anijeje mallrash që po kalonte në këtë zonë strategjike.
Shefi i IMO-s, Arsenio Dominguez, tha se disa anije tashmë ishin evakuuar, por se agjencia dëshiron të sigurohet që “garancitë e nevojshme të sigurisë” do të vazhdojnë të jenë në fuqi. Agjencia britanike e sigurisë detare UKMTO raportoi të enjten se një anije ishte goditur rreth 7.5 milje detare në juglindje të portit Dahit në Oman, nga “një projektil i panjohur”.
Nuk janë raportuar viktima. Sipas autoriteteve amerikane, të cituara nga mediat, dyshohet se anija është qëlluar nga Irani. Firma për menaxhimin e rrezikut detar Vanguard tha se anija me flamur të Singaporit, “Ever Lovely”, vazhdoi lundrimin nëpër ngushticë pavarësisht sulmit, raporton BBC , transmeton Sinjali.
Të dhënat e faqes MarineTraffic tregojnë se “Ever Lovely” kishte ndjekur një rrugë jugore të identifikuar nga IMO, duke udhëhequr një flotë prej katër anijesh të tjera, raportoi Wall Street Journal. Sipas dëshmive të detarëve të flotës, nuk ka pasur paralajmërim nga marina iraniane gjatë komunikimeve radio.
Shefi i IMO-s, Dominguez, deklaroi se anija e sulmuar “nuk po lundronte sipas kornizës së evakuimit të IMO-s”. “Kam theksuar gjithmonë se siguria e detarëve është prioritet. Për këtë arsye, për të siguruar një qasje të koordinuar dhe siguri lundrimi, plani i evakuimit do të pezullohet derisa të ketë qartësi të mëtejshme,” tha ai.
Qindra anije dhe mijëra detarë kanë mbetur të bllokuar në Gjirin Persik që nga shkurti, për shkak të luftës SHBA-Izrael kundër Iranit. Operacioni i evakuimit i OKB-së ishte njoftuar të martën pas rihapjes së ngushticës, me Dominguez që kishte deklaruar se bëhej fjalë për një “operacion në shkallë të gjerë” me bashkëpunimin e Iranit, Omanit, SHBA-së dhe shteteve të tjera të rajonit.
Sipas autoriteteve iraniane, anijet që kalojnë jashtë rrugëve të caktuara nuk garantohet se do të kenë kalim të sigurt. Në një deklaratë, autoriteti i Ngushticës së Gjirit Persik tha se çdo pasojë nga përdorimi i rrugëve të paautorizuara do të mbajë përgjegjës pronarin dhe operatorin e anijes.
Disa anije thuhet se kanë përdorur një rrugë alternative në jug të ngushticës, pranë brigjeve të Omanit. Sinjali – aty ku e vërteta flet para lajmit!