Ylli i Realit kërkon që të ‘shqyejë’ kontratën me klubin, për t’u larguar nga klubi

Sipas raportimeve, Real Madridi ka refuzuar kërkesën e një lojtari për të prishur kontratën e tij në mënyrë që të përshpejtojë largimin nga klubi. “Los Blancos” pritet të bëjnë ndryshime të mëdha në skuadër pas rikthimit të Jose Mourinhos, me Ibrahima Konaten, Bernardo Silvan, Denzel Dumfriesin dhe Marc Cucurellan që i janë bashkuar ekipit si pjesë e rindërtimit të ri pas një sezoni pa trofe. Natyrisht, shumë lojtarë do të duhet të largohen nga Real Madridi këtë verë dhe mes atyre që përmenden si kandidatë për largim janë Eduardo Camavinga, Rodrygo, Franco Mastantuono, Fran Garcia dhe Raul Asencio. E ardhmja e mesfushorit Dani Ceballos është gjithashtu e paqartë, pasi spanjolli ka vetëm një vit të mbetur në kontratën e tij. Ceballos ka regjistruar më shumë se 200 paraqitje për Real Madridin, por vitet e fundit ka qenë kryesisht një lojtar i rotacionit, pasi u rikthye nga huazimi dyvjeçar tek Arsenali. Edhe pse Real Madridi është i gatshëm ta lejojë të largohet këtë verë, thuhet se dëshiron ta bëjë këtë sipas kushteve të veta. Sipas “Mundo Deportivo”, dëshira e Ceballos është të rikthehet tek ish-klubi i tij, Real Betis, për një aventurë të dytë dhe ai ka propozuar të heqë dorë nga viti i fundit i kontratës për t’u larguar si lojtar i lirë. Megjithatë, edhe pse kjo do ta lehtësonte largimin e tij, Real Madridi thuhet se është i vendosur të përfitojë një shumë nga transferimi dhe nuk dëshiron ta humbasë pa asnjë kompensim. Klubi e vlerëson Ceballos me rreth 8 milionë euro dhe beson se 29-vjeçari ende meriton një tarifë të konsiderueshme transferimi për shkak të moshës dhe cilësive të tij. Betisi raportohet se nuk është i gatshëm të paguajë shumën që kërkon Reali, ndaj rikthimi i ëndërruar i Ceballos mund të mos realizohet nëse dy klubet nuk arrijnë një marrëveshje. Përveç kësaj, ekziston edhe interes i fortë nga gjiganti holandez Ajax, i cili thuhet se është afër dakordimit për një shumë të ngjashme me vlerësimin që i bën Reali lojtarit. Për momentin, ky transferim nuk është zgjedhja e preferuar e Ceballos, pasi ai dëshiron të qëndrojë në Spanjë. Marrëdhënia e Ceballos me Alvaro Arbeloan u përkeqësua sezonin e kaluar, me raportime që pretendojnë se të dy u përfshinë në një debat lidhur me mungesën e minutave të lojës për mesfushorin. Takimi mes tyre nuk shkoi mirë dhe Ceballos nuk luajti më për Real Madridin gjatë pjesës së mbetur të sezonit. I pyetur për raportimet mbi konfliktin, Arbeloa deklaroi në një konferencë për shtyp. “Nuk përfshihem në debate publike për lojtarët e mi. Kanë kaluar 20 vjet që kur u stërvita si lojtar i Real Madridit dhe gjëja e parë që mësova nga lojtarët veteranë ishte se ajo që ndodh në dhomat e zhveshjes së Real Madridit, mbetet në dhomat e zhveshjes së Real Madridit.” Në teori, largimi i Arbeloas dhe ardhja e Mourinhos mund t’i japin Ceballos një mundësi të re, por gjithçka tregon se mesfushori do të largohet këtë verë. Ceballos e nisi karrierën te Real Betis, ku zhvilloi 105 ndeshje përpara se të transferohej te Real Madridi në vitin 2017. Ai ka zhvilluar 13 ndeshje me kombëtaren e Spanjës, ndërsa paraqitja e tij e fundit daton në vitin 2023.