Vendet anëtare të Bashkimit Evropian kanë rënë dakord unanimisht për hapjen e një grupi të ri negociatash për anëtarësimin e Ukrainës dhe Moldavisë në BE. Vendimi u mor të premten nga ambasadorët e 27 vendeve të BE-së, të cilët miratuan qëndrimin e përbashkët për hapjen e klasterit të gjashtë, që lidhet me marrëdhëniet e jashtme.
Ceremonitë zyrtare për hapjen e këtij klasteri do të zhvillohen më 14 korrik në Bruksel, veçmas për Ukrainën dhe Moldavinë, raporton Euronews, transmeton Sinjali. Ky hap vjen pas ndryshimit të qëndrimit të Hungarisë, e cila për dy vite kishte bllokuar procesin e negociatave për Ukrainën.
Kryeministri i ri hungarez, Péter Magyar, hoqi veton në fillim të qershorit, duke mundësuar hapjen e klasterit të parë, që lidhet me çështjet themelore. Klasteri i gjashtë konsiderohet një nga më të lehtët për t’u hapur, për shkak të fushës më të kufizuar që mbulon.
Megjithatë, Ukraina dhe Moldavia ende kanë katër klasterë të tjerë të bllokuar: tregun e brendshëm, konkurrueshmërinë dhe rritjen gjithëpërfshirëse, agjendën e gjelbër dhe lidhshmërinë e qëndrueshme, si dhe burimet, bujqësinë dhe kohezionin.
Komisioni Evropian vlerëson se të dyja vendet janë teknikisht të gatshme për hapjen e të gjitha klasterëve, por vendimi për hapat e ardhshëm varet nga dakordimi politik i vendeve anëtare. Ukraina ka kërkuar që procesi të përparojë sa më shpejt para pushimit veror, një qëndrim i mbështetur edhe nga Komisioni Evropian dhe shumica e vendeve të BE-së.
Megjithatë, kryeministri hungarez Péter Magyar ka shprehur rezerva ndaj një ritmi të tillë, duke argumentuar se një përshpejtim i negociatave do të dëmtonte procesin e vendeve të Ballkanit Perëndimor, të cilat kanë qenë në pritje për një kohë më të gjatë.
Pritet që klasterët e mbetur të trajtohen një nga një nga shtatori, ndërsa pas hapjes së secilit klaster, vendet kandidate fillojnë negociatat për kapitujt përkatës. Sinjali – aty ku e vërteta flet para lajmit!