Një 14-vjeçar mbeti i vdekur mbrëmë në Prizren pasi dyshohet se është therur me thikë nga një 17-vjeçar. Prokuroria Themelore në Prizren ka njoftuar se i dyshuari për vrasjen është hasur në vendin e ngjarjes dhe nga i njëjti është sekuestruar një thikë, e cila dyshohet se është përdorur për ta kryer veprën penale.
Me vendim të prokurorit të shtetit, 17-vjeçari është ndaluar për 24 orë, për shkak të dyshimit se ka kryer veprat penale “Vrasja e rëndë” dhe “Mbajtja në pronësi, kontroll ose posedim të paautorizuar të armëve”. “Brenda afatit ligjor, Prokuroria do të parashtrojë kërkesë për caktimin e masës për sigurimin e të miturit në procedurë”- thuhet në njoftimin e Prokurorisë në Prizren.
Duke dhënë detaje për rastin, Prokuroria ka bërë të ditur se pas pranimit të informatës mbrëmë rreth orës , menjëherë në vendin e ngjarjes kanë dalë njësitet relevante të Policisë së Kosovës, hetuesi kujdestar, ekipet e krim-teknikës dhe zyrtarët e Institutit të Mjekësisë Ligjore (IML).
Kjo me qëllim të zhvillimit dhe përfundimit të procedurave hetimore në vendin e ngjarjes, ku janë siguruar prova materiale që vërtetojnë kryerjen e veprës penale. “Me urdhër të prokurorit, trupi i viktimës është dërguar për obduksion në IML.
Prokuroria Themelore në Prizren, në bashkëpunim me Policinë e Kosovës thekson se është duke vazhduar hetimet intensive për zbardhjen e motiveve dhe rrethanave të plota të kësaj ngjarje.