David Fadairo shkëlqeu me Dinamon në Europë. Sulmuesi i huazuar nga Partizani tundi rrjetën në tri ndeshjet e fundit, ndërsa dy gola i gjeti kundër Pafosit. 25-vjeçari do të kthehet tashmë te “demat”, të cilët sakrifikuan shumë duke e huazuar te Dinamo.
Bëhet fjalë për bllokimin e Fadairos, i cili nëse luan edhe me Partizanin humbet të drejtën për t’u aktivizuar diku tjetër gjatë këtij sezoni. Fadairo do të kishte në janar mundësinë vetëm për aktivizimin te Dinamo. Kjo për shkak të rregullit të UEFA-s. Një lojtar mund të federohet në tre klube të ndryshme, por lejohet të luajë vetëm për dy ekipe gjatë një sezoni.
Fadairo është shprehur se ofertat për të nuk mungojnë. Nëse Partizani nuk realizon shitje deri më 1 shtator, atëherë ai do të jetë i detyruar të qëndrojë te “demat” dhe Dinamo do të ishte opsioni i vetëm në janar. Njësoj është situata edhe për Rrok Tomën, i cili dha kontribut te Vllaznia në Europë.