Manchester United është i vendosur të bëjë një lëvizje të madhe në tregun e transferimeve dhe po përgatit një ofertë zyrtare për mesfushorin francez të Real Madridit, Eduardo Camavinga.
Skuadra e drejtuar nga Michael Carrick është përforcuar ndjeshëm në mesfushë gjatë këtij afati kalimtar, duke transferuar Andrey Santos nga Chelsea, Youri Tielemans nga Aston Villa dhe, së fundmi, Carlos Baleba nga Brighton. Megjithatë, drejtuesit e klubit dhe trajneri duan edhe një përforcim tjetër në këtë repart.
Në listën e dëshirave të tyre është Camavinga, i cili përveç pozitës së mesfushorit mund të mbulojë edhe rolin e mbrojtësit të krahut të majtë. “Djajtë e Kuq” janë të etur për të realizuar një transferim të menjëhershëm, duke synuar përforcimin e mesfushës me një nga talentët e rinj më të gjithanshëm në futbollin botëror.
Sipas një raporti nga Cadena SER , Manchester United ka përgatitur një ofertë zyrtare prej 50 milionë eurosh për transferimin e Camavingas nga Real Madridi. Megjithatë, pavarësisht interesimit të fortë dhe fuqisë financiare të United, operacioni pritet të jetë jashtëzakonisht kompleks për shkak të rolit që mesfushori ka brenda skuadrës së “Los Blancos”.
Mosha e re dhe gjithanshmëria e Camavingas po bëjnë që drejtuesit e klubit nga “Santiago Bernabéu” të hezitojnë për largimin e tij, pavarësisht raportimeve të shumta se francezi mund të jetë në shitje. Sinjali – aty ku e vërteta flet para lajmit!