Franca do të dëbojë dy diplomatë iranianë në ditët në vijim, në një tjetër përshkallëzim të tensioneve diplomatike mes Parisit dhe Teheranit. Lajmi është bërë i ditur nga ministri i Jashtëm francez, Jean-Noël Barrot, i cili e njoftoi vendimin përmes një postimi në platformën X.
Barrot tha se masa vjen si përgjigje ndaj një incidenti të ndodhur muajin e kaluar në Teheran, ku dy punonjës të ambasadës franceze u ndaluan nga autoritetet iraniane. Vendimi i Francës u bë publik një ditë pasi Ministria e Jashtme e Iranit njoftoi se dy punonjësit e ambasadës franceze në Teheran, të përfshirë në mosmarrëveshjen diplomatike, nuk do të lejoheshin të ktheheshin në Iran.
Sipas autoriteteve franceze, dy punonjësit e ambasadës u ndaluan dhe u kërcënuan nga pjesëtarë të shërbimeve iraniane të sigurisë gjatë muajit të kaluar. Parisi e ka cilësuar incidentin si të papranueshëm dhe si shkelje të imunitetit diplomatik.
Nga ana tjetër, Teherani ka pretenduar se dy punonjësit francezë ishin përfshirë në aktivitete që mbështesnin shoqërinë civile iraniane, duke i konsideruar këto veprime si ndërhyrje në çështjet e brendshme të vendit dhe shkelje të Konventës së Vjenës.
Përplasja e fundit përbën një tjetër përkeqësim të marrëdhënieve diplomatike mes Francës dhe Iranit, ndërsa të dyja palët kanë ndërmarrë masa reciproke ndaj personelit diplomatik. Sinjali – aty ku e vërteta flet para lajmit!