Ministria e Mbrojtjes ka bërë bilancin e situatës së zjarreve në vend gjatë 24 orëve të fundit, ku janë raportuar 35 vatra zjarri. Aktualisht, 8 prej tyre vijojnë të jenë aktive, ndërsa strukturat e emergjencave po punojnë për izolimin dhe shuarjen e tyre. Në operacionet për menaxhimin e situatës janë angazhuar 533 forca operacionale dhe 39 automjete zjarrfikëse.
Në mbështetje të tyre janë aktivizuar edhe 186 efektivë të Forcave të Armatosura, 4 helikopterë dhe 2 avionë Air Tractor. Aktualisht në terren vijojnë të operojnë 120 efektivë të Forcave të Armatosura, 2 helikopterë dhe 2 avionë Air Tractor. Në Dajt të Tiranës vijon operacioni për shuarjen e zjarrit në zonën mbi tunelet e Qafë-Mollës.
Në terren janë angazhuar 50 efektivë të Forcave të Armatosura dhe 2 helikopterë. Sipas Ministrisë së Mbrojtjes, nuk raportohet rrezik për zonat e banuara. Ndërkohë, në Priskë, Farkë dhe zonat përreth, ndërhyrja e 30 forcave të MZSH-së me 6 mjete ka bërë të mundur vendosjen e zjarrit nën kontroll. Në Krujë, vijon puna për shuarjen e vatrave në Abazë dhe Zidoll.
Ndërhyrjet nga toka, të mbështetura gjatë ditës së djeshme edhe nga ajri, kanë ndihmuar në përmirësimin e situatës. Në Zidoll, forcat po punojnë për izolimin dhe shuarjen përfundimtare të zjarrit, ndërsa edhe këtu nuk raportohet rrezik për banesat.
Një nga operacionet kryesore vijon në Gurë-Lurë, Dibër, ku hapja e korridoreve me mjete dhe forca ka ndihmuar në frenimin e përparimit të flakëve drejt zonave të banuara. Operacioni vijon me forcat në terren, të mbështetura nga 50 efektivë të FA-së, 2 avionë Air Tractor dhe 1 autobot uji.
Në Qafë Helmes, në zonën Bulqizë-Selishtë, operacioni vijon me mbështetjen e 20 efektivëve të Forcave të Armatosura. Edhe në këtë zonë nuk raportohet rrezik për banesat. Në Lezhë, Elbasan dhe Shkodër vijon puna për izolimin dhe shuarjen e vatrave të mbetura në Lufaj, Dardhë dhe në pyjet e Tërbunit.
Ndërkohë, situata është përmirësuar në Përmet, Trojë, Qukës dhe Paulesh, ku zjarret janë shuar plotësisht falë ndërhyrjes së forcave operacionale.
Ministria thekson se Agjencia Kombëtare e Mbrojtjes Civile (AKMC) vijon monitorimin e pandërprerë të situatës dhe koordinimin e strukturave të Mbrojtjes Civile, me prioritet mbrojtjen e jetës së qytetarëve, banesave dhe vënien sa më shpejt nën kontroll të vatrave aktive. Sinjali – aty ku e vërteta flet para lajmit!