Presioni ndaj presidentit të FIFA-s, Gianni Infantino, po rritet ndjeshëm. Federata e Futbollit të Republikës së Irlandës (FAI) ka vendosur zyrtarisht të tërheqë mbështetjen për Infantinon, ndërsa Federata e Futbollit të Irlandës së Veriut (IFA) ka bërë të ditur se mbështet qëndrimin e UEFA-s.
Vendimi vjen pas polemikave të fundit rreth përpjekjes së Infantinos për të shitur një pjesë të operacioneve komerciale të FIFA-s te një kompani private investimesh. Marrëveshja më pas u braktis, por situata ka shkaktuar shqetësime të mëdha për qeverisjen dhe transparencën e FIFA-s.
FAI ndryshon qëndrim FAI, e cila më herët kishte dhënë mbështetjen për kandidaturën e Infantinos për një mandat të katërt, ka vendosur ta tërheqë atë pas zhvillimeve të fundit. “Pas një mbledhjeje të bordit të FAI-t, u mor vendimi për të tërhequr letrën e mbështetjes që Asociacioni kishte dhënë më herët këtë vit” , thuhet në deklaratën e federatës.
FAI theksoi se, pavarësisht mirënjohjes për mbështetjen që FIFA i ka dhënë futbollit irlandez, zhvillimet e fundit kanë ngritur “shqetësime të rëndësishme sa i përket qeverisjes, transparencës dhe mungesës së konsultimit domethënës”.
IFA mbështet UEFA-n Ndërkohë, IFA nuk ka shkuar deri në tërheqjen zyrtare të mbështetjes për Infantinon, por ka bërë të qartë se qëndron pas pozicionit të UEFA-s. “Ne mbështesim qëndrimin aktual të UEFA-s për këtë çështje dhe do të vazhdojmë të angazhohemi në mënyrë konstruktive për çështjet që lidhen me qeverisjen e futbollit”, deklaroi një zëdhënës i IFA-s.
UEFA, së bashku me Concacaf dhe Konfederatën Aziatike të Futbollit (AFC), kishte akuzuar Infantinon për thyerje të besimit “përmes mashtrimit”, pas tentativës për ndryshimin e strukturës komerciale të FIFA-s. Uellsi ishte federata e parë e vendeve britanike që tërhoqi mbështetjen për Infantinon, ndërsa Anglia dhe tashmë Irlanda kanë ndjekur të njëjtën rrugë.
Me zgjedhjet presidenciale të FIFA-s në horizont, kjo valë tërheqjesh dhe qëndrimi kritik nga federatat evropiane e vendos gjithnjë e më shumë në presion kandidaturën e Infantinos për një mandat të katërt.