Sulmuesi argjentinas Julian Alvarez rikthehet sot, të hënën, në stërvitjet parasezonale të Atletico Madridit, me shpresën për ta detyruar klubin të hapë derën për negociata mbi transferimin e tij te Barcelona. Sulmuesi kishte deklaruar publikisht dëshirën e tij për t’u transferuar te Barcelona gjatë Botërorit.
Sipas gazetës “Sport”, që prej atëherë nuk ka pasur asgjë tjetër veçse zhurmë rreth kësaj çështjeje. Reagimi i vetëm zyrtar i Atletico Madridit ndaj ofertës së Barcelonës ishte ankesa drejtuar FIFA-s dhe Federatës Spanjolle, me pretendimin se klubi katalanas kishte negociuar me një lojtar që kishte ende kontratë në fuqi gjatë periudhës së mbrojtur.
Drejtori ekzekutiv Miguel Angel Gil Marin dhe presidenti Enrique Cerezo gjithashtu u prononcuan, duke theksuar qartë se nuk do ta lejonin Julian Alvarez të largohej këtë verë. Diego Simeone e mbylli javën me një deklaratë të prerë: “Situata është e qartë, klubi ka marrë një vendim”.
Barcelona, ndërkohë, iu përgjigj lëvizjes së Alvarez duke paraqitur ofertën e parë dhe duke e bërë publik interesimin për të. Në javët e fundit, megjithatë, klubi katalanas ka heshtur. Barcelona e di se marrëveshja është jashtëzakonisht e vështirë dhe për këtë arsye ka vepruar me kujdes maksimal në çdo hap.
Deco udhëtoi drejt Madridit për t’u takuar me agjentin e sulmuesit dhe gazetarët e “Sport” dhe “Jijantes” zbuluan takimin. Përtej kësaj vizite, Barcelona nuk kishte dëshirë të hynte në polemika apo të shkëmbente deklarata publike me Atletico Madridin. Por gjithçka ndryshon sot, të hënën.
Drejtuesit e Barcelonës e kishin shënuar me të kuqe datën 10 gusht që në momentin kur Julian bëri të qartë se dëshironte të largohej nga “Metropolitano”. Arsyeja? Kjo është dita kur argjentinasi rikthehet në stërvitjet e Atletico Madridit. “La Araña” nis përgatitjet parasezonale me kontrollet e zakonshme mjekësore dhe testet fizike, ndërsa pritshmëria rreth tij ka arritur kulmin.
Nëse nuk ndodh ndonjë surprizë e madhe, Alvarez pritet të sillet si gjithmonë në mënyrë profesionale. Ai dha gjithçka sezonin e kaluar, vetëm pak muaj përpara Botërorit, për të ndihmuar skuadrën me të cilën ende ka kontratë. Ai nuk pritet të rebelohet kundër klubit. Fillimisht, megjithatë, pritet që ai të ulet në bisedime me Simeonen dhe më pas me drejtuesit e klubit gjatë kësaj jave.
Qëllimi është të qartësohet situata dhe Alvarez të përsërisë dëshirën e tij për të ndryshuar ambient, njësoj siç bëri rreth një muaj e gjysmë më parë, duke kërkuar transferimin në Spotify Camp Nou. Barcelona e di shumë mirë se marrëveshja do të jetë jashtëzakonisht e komplikuar.
Qëndrimi i Atletico Madridit ka qenë i palëkundur deri tani, por klubi katalanas shpreson në një faktor të vetëm: një kërkesë e re e Julianit për t’u larguar, këtë herë e bërë privatisht dhe në mirëbesim, mund t’i shtyjë drejtuesit e Atletico Madridit të rishqyrtojnë pozicionin e tyre dhe të hapin derën për negociata.
Nëse kjo ndodh, Barcelona do të paraqesë një ofertë të re për të siguruar objektivin e saj kryesor të merkatos dhe për të përforcuar sulmin. Deco ka dëshmuar një gjë gjatë kësaj merkatoje: ai di të punojë në heshtje. Ai finalizoi transferimet e Anthony Gordon dhe Karim Adeyemit, si dhe huazimin e Ronald Araujos te Liverpooli, në kohë rekord dhe larg vëmendjes së mediave.
Drejtuesit e Barcelonës natyrisht që po punojnë edhe për alternativa ndaj Julian Alvarez, duke marrë parasysh pengesat e vazhdueshme që po vendos Atletico Madridi, por nuk do të aktivizojnë asnjërën prej tyre pa mësuar fillimisht se çfarë do të ndodhë me “La Araña”. Ditët e ardhshme do të jenë vendimtare për të ardhmen e Julian Alvarez dhe mund t’i japin fund përfundimisht kësaj sage.
Kanë mbetur ende disa javë deri në mbylljen e merkatos. Megjithatë, nëse Atletico Madridi nuk ndryshon qëndrim, Barcelona do të duhet të shqyrtojë alternativa të tjera. Flick ka qenë më i qartë se kurrë: ai ka nevojë për një numër 9 të klasit botëror për sezonin e ardhshëm, veçanërisht nëse Ferran Torres largohet, në mënyrë që Barcelona të ketë mundësi të luftojë për çdo trofe.