Dy persona janë arrestuar nga shërbimet e Policisë Kufitare në Korçë, pasi dyshohet se kundrejt pagesës u kanë dhënë ndihmë 28 shtetasve sudanezë për transportimin e tyre drejt veriut të Shqipërisë, me qëllim kalimin e paligjshëm të kufirit për në Malin e Zi.
Operacioni policor i koduar “Route” është finalizuar nga shërbimet e Drejtorisë Vendore për Kufirin dhe Migracionin Korçë, në kuadër të kontrolleve intensive për parandalimin dhe goditjen e veprimtarisë kriminale që lidhet me dhënien e ndihmës emigrantëve për kalim të paligjshëm të kufirit.
Sipas njoftimit të Policisë së Shtetit, operacioni është organizuar pas informacioneve të siguruara në rrugë operative dhe veprimeve të kryera nga shërbimet e Policisë Kufitare. Në kuadër të operacionit janë arrestuar shtetasit J. M., alias D. M., 42 vjeç, banues në Korçë, dhe E. D., 31 vjeç, banues në fshatin Belorta, Maliq. Të dy shtetasit janë kapur në flagrancë në fshatin Plasë, Maliq.
Sipas policisë, ata kishin grumbulluar në këtë zonë rreth 28 shtetas sudanezë, të cilët synonin të vazhdonin rrugëtimin drejt veriut të Shqipërisë. Nga veprimet e kryera rezultoi se shtetasit sudanezë transportoheshin në grupe prej 7-8 personash, me mjete të ndryshme, drejt veriut të vendit.
Sipas policisë, destinacioni i tyre ishte kufiri me Malin e Zi, me synim kalimin në mënyrë të paligjshme në territorin malazez. Transportimi i tyre dyshohet se kryhej kundrejt pagesës, ndërsa veprimtaria e dy të arrestuarve lidhet me dhënien e ndihmës për kalimin e paligjshëm të kufirit.
Gjatë veprimeve policore janë sekuestruar në cilësinë e provës materiale një automjet, 6,500 euro dhe 3 aparate celularë. Në vijim të verifikimeve, policia ka konstatuar gjithashtu se shtetasi E. D., 31 vjeç, ishte me masën e sigurisë “Arrest në shtëpi”.
Policia e Shtetit ka thënë se po vijon kontrollet dhe veprimet për parandalimin dhe goditjen e rasteve të ndihmës ndaj emigrantëve për kalim të paligjshëm të kufirit. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.