Një ngjarje tragjike ka tronditur ishullin grek të Parosit, ku një fëmijë 4-vjeçar humbi jetën pasi u gjet pa ndjenja në pishinën e një bari pranë plazhit. Sipas informacioneve paraprake, fëmija u pikas në ujë nga dy gra, të cilat njoftuan menjëherë stafin e lokalit. Një prej punonjësve ndërhyri dhe e nxori të miturin nga pishina, ndërsa u kërkua ndihma e shërbimeve mjekësore.
Një ambulancë e EKAB mbërriti në vendngjarje dhe ekipet e emergjencës nisën përpjekjet për t’i dhënë ndihmën e nevojshme fëmijës. Pavarësisht ndërhyrjes së tyre, 4-vjeçari nuk mundi të mbijetonte. Në momentin e ngjarjes, prindërit e fëmijës ndodheshin në ambientet e barit, ndërsa autoritetet po hetojnë rrethanat në të cilat i mituri përfundoi në pishinë.
Në kuadër të hetimeve, Policia greke ka arrestuar pronarin e barit të plazhit dhe prindërit e fëmijës. Autoritetet po verifikojnë nëse ka pasur neglizhencë apo shkelje të rregullave të sigurisë dhe po punojnë për përcaktimin e përgjegjësive përkatëse. Ngjarja ka shkaktuar tronditje në ishull, ndërsa hetimet vijojnë për zbardhjen e plotë të rrethanave të tragjedisë.