Kuvendi i Kosovës ka njoftuar se në seancën e sotme konstituive deputetët e Legjislaturës XI dhanë betimin, por procesi nuk u përmbyll pasi nuk u propozua kandidati për kryetar të Kuvendit. Seanca u drejtua nga deputeti më i vjetër, Avni Dehari, i shoqëruar nga deputetja më e re, Fatma Taçi.
Fillimisht u formua Komisioni i përkohshëm për verifikimin e kuorumit dhe mandateve, ndërsa më pas u miratua raporti i tij dhe deputetët dhanë betimin. Në pikën e tretë të rendit të ditës, që kishte të bënte me zgjedhjen e kryetarit të Kuvendit, fjalën e mori kryeministri në detyrë dhe deputeti i Lëvizjes Vetëvendosje, Albin Kurti.
Ai nuk propozoi kandidat për kryetar të Kuvendit, por kërkoi kohë shtesë për vazhdimin e bisedimeve me partitë parlamentare rreth zgjedhjes së presidentit të ri të vendit. Kurti tha se kishte zhvilluar takime me kryetarin e PDK-së, Bedri Hamza, dhe atë të LDK-së, Lumir Abdixhiku, ndërsa shtoi se synohen bisedime edhe me PDK-në dhe AAK-në.
“Konstituimi kësaj radhe nuk bën të jetë sërish drejt edhe një shpërndarjeje të Kuvendit dhe përsëri zgjedhjeve të parakohshme, të paarsyeshme, të panevojshme për qytetarët e të dëmshme për ekonominë”, deklaroi Kurti. Ai kërkoi që partive t’u jepej më shumë kohë për arritjen e një marrëveshjeje sa më të gjerë për presidentin ose presidenten e re.
Pas fjalimit të Kurtit, kryesuesi Avni Dehari tha se, meqë subjekti më i madh parlamentar nuk kishte propozuar kandidat për kryetar të Kuvendit, ishte i obliguar ta ndërpriste seancën. Kuvendi nuk ka bërë të ditur se kur do të vazhdojë seanca konstituive, ndërsa sipas aktgjykimit të Gjykatës Kushtetuese, afati për konstituimin e Kuvendit përfundon nesër.
Sinjali – aty ku e vërteta flet para lajmit!