Trajneri i Chelseat, Xabi Alonso, ka konfirmuar se Mykhailo Mudryk mund të luajë në ndeshjen ndaj Juventusit në Hong Kong, pasi dënimi katërvjeçar për doping iu anulua. Anësori ukrainas iu bashkua sërish skuadrës të martën dhe u prit me entuziazëm të madh nga tifozët vendas.
Gjatë konferencës për shtyp në stadiumin “Kai Tak”, Alonso bëri të ditur se Mudryk është i gatshëm për t’u përfshirë në listën e ndeshjes së së mërkurës ndaj Juventusit. Futbollisti, i transferuar nga Shakhtar Donetsk për 89 milionë funte, u rikthye në stërvitje pasi procedurat për rastin e tij të dopingut me Federatën Angleze të Futbollit përfunduan në favor të tij.
Mudryk ishte pezulluar përkohësisht pasi rezultoi pozitiv me substancën meldonium. Ndeshja e tij e fundit ishte në nëntor të vitit 2024, kur shënoi ndaj Heidenheimit në Ligën e Konferencës. Pas ankesës në Gjykatën e Arbitrazhit për Sport (CAS), dënimi iu anulua, duke i hapur rrugën rikthimit në stërvitje.
Në seancën e hapur të së martës, ai mori duartrokitjet më të mëdha nga tifozët e pranishëm. Duke folur për mediat, Alonso u shpreh i lumtur për rikthimin e ukrainasit, por theksoi se atij do t’i duhet kohë për të arritur formën optimale. “U stërvitëm dje. Ai erdhi direkt nga aeroporti në hotel.
Dita e djeshme ishte më shumë për ndjesitë dhe emocionet e rikthimit me skuadrën, si dhe për të vlerësuar gjendjen e tij fizike. Po, ai mund të luajë. Ndoshta 90 minuta janë ende herët, por ai është në dispozicion. Është grumbulluar dhe mund të aktivizohet. Jemi shumë të lumtur që Misha është sërish me ne.
E patë buzëqeshjen e tij dhe sa i lumtur është që është pjesë e ekipit, sepse për një kohë të gjatë është stërvitur i vetëm.” Pavarësisht se Mudryk ka edhe pesë vite kontratë me Chelsean, klubi ende nuk ka marrë një vendim përfundimtar për të ardhmen e tij.
Sipas raportimeve, tri skuadra të Premierligës, mes tyre Coventry City i drejtuar nga Frank Lampard, kanë shprehur interesim për ta marrë në huazim. I pyetur për spekulimet rreth së ardhmes së lojtarit, Alonso deklaroi: “ Nuk kemi marrë ende një vendim. Duhet ta vlerësojmë situatën. Ai është një lojtar i veçantë, por edhe rasti i tij është i veçantë, ndaj duhet të tregojmë ndjeshmëri.
Është normale të presim që rikthimi në formën dhe ritmin maksimal të kërkojë më shumë kohë”. Ndërkohë, Chelsea ka përforcuar edhe stafin teknik me specialistin e goditjeve standarde Austin MacPhee, i ardhur nga Aston Villa, ndërsa përforcimi i ri Danny Welbeck është gjithashtu në garë për të luajtur ndaj Juventusit.